«Биылдан бастап кейбір мамандық иелеріне 55 жастан демалысқа шығуға компания мүмкіндік беріп отыр»...
Атырау облысы бойынша меншікті тілші
Кәсіпорынның қаржы-экономикалық көрсеткіштері негізінен қызмет көрсету арқылы тапқан табысына байланысты. Темір жолда ол тасымал арқылы көрінеді. Атырау қосалқы бөлімінің бүгінгі күнгі табысы, қаржылық жағдайы туралы бөлім бастығының қаржы және экономика жөніндегі орынбасары Мұрат Жүгінісов баяндайды.
– Мұрат Терекбайұлы, былтырғы жылы бөлімшенің қаржылық жағдайы қалай болды, тасымал деңгейі қай деңгейден көрінді?
– Қосалқы бөлімде табыс негізінен мұнай өнімдерінің тасымалы арқылы түсетінін білесіз. Жалпы елімізде пойыз тасымалына деген сұраныс та, қажеттілік те, мүмкіндік те көп қой. Былтырғы жылы негізгі қызметтен 79 млрд теңгеге жуық табыс тауып, жоспар 102%-ке орындалды. Оның ішінде пойыз тасымалынан түскен, локомотив тартымынан, қосымша жинақтан және қызметтің қосымша-көмекші түрінен түскен табыстар бар. Соңғысынан 866 млн теңгеден астам кіріс кірді. Ол бағытта біздің тауар кассирлері сырт мекемелерге қызмет көрсетеді, кеңсе жалға беріледі, т.б. Сондай-ақ ағымдағы ағыту-жөндеу қызметі арқылы да, яғни вагондарға қызмет көрсету-жөндеу негізінде жақсы қаржылық нәтижеге қол жеткізілді.
– Ол көрсеткіштер жұмысшылардың табысына, еңбек жағдайына әсер ете ме?
– Әрине. Қазірі таңда бөлімде 2262 адам еңбек етеді. Бүгінде жұмысшылардың орташа айлық еңбекақысы жоспар бойынша 417 248 теңге болса, іс жүзінде 506 846 теңгені құрады. Еңбек өнімділігі жүз пайызға жуық орындалып отыр. Зейнеткерлер де назардан тыс қалған емес. Еңбек шартына сәйкес берілуі тиіс материалдық төлемнің барлық түрі төленіп отыр. Мәселен, тек шипажайларда демалуға 52 зейнеткерге 8 млн 163 мың теңге бөлінді.
– Зейнеткерлікке ерте шығу жайы қалай және олар қандай жәрдемақы ала алады?
– «Жасына сәйкес салалық жәрдемақы» ережесіне сәйкес биылдан бастап кейбір мамандық иелеріне (машинист, пойыз құрастырушы, вагон қараушы, жолшы, т.б.) өз өтініші негізінде 55 жастан демалысқа шығуға компания мүмкіндік беріп отыр. Олар кемінде 208 мың теңге аралығында ай сайынғы жәрдемақы алады. Оларға ол төрт жерден: жұмыс беруші, әлеуметтік қор, БЖЗҚ және жеке жинағы арқылы төленеді. Жалпы, айта кетерлігі, биыл АЕК көлемі 3692 теңгеге өсуіне байланысты жұмысшыларға да, зейнеткерлерге де көрсетілетін әлеуметтік қоржын көлемі де артып отыр. Мәселен жаңа ұжымдық шарт бойынша сәбилі болу, некеге тұру, мүгедектікке байланысты, т.т берілетін көмек бірнеше есеге өскен.
– Былтырғы жылы жұмысшыларға қандай көмектер көрсетілді?
– «ҚТЖ» ҰК» АҚ комиссиясының шешімі бойынша былтыр 31 жұмысшыға 2 млн 119 мың теңге көмек берілді. Оған қоса ұжымдық шартпен қарастырылған сәбилі болғанға байланысты, мүгедек-балаларға, ауған ардагерлеріне, балаларды қорғау күні, 1 қыркүйек, отбасы күні, санаторийде демалуға, т.б. материалдық көмектер берілді. Шалғай станцияларда балаларға жаңажылдық ертеңгілік өтпейтіндіктен 687 балаға 1 млн 390 мың теңге көлемінде қаржы таратылды. Қорыта айтқанда, өткен жылда барлығы 220 млн теңгеге жуық қаражат жұмысшылардың әлеуметтік жағдайын жақсартуға бөлінді. Қысқасы, экономикалық көрсеткіштер көтеріңкі болса, теміржолшылардың жағдайы да жақсара түспек.