ҚТЖ-ның «Топжарған: Жаңа күш» бағдарламасына кезекті мамандар легі жиналды

Ұлттық компанияның әлеуметтік тұрақтылығын қамтамасыз етуге бағытталған «Топжарған: Жаңа күш» бағдарламасы биыл тәуелсіздік мерекесі қарсаңында үшінші рет өткізілді. Республиканың түкпір-түкпірінен жиналған сала қызметкерлері елорда төрінде бас қосып, компания үшін маңызды міндеттерді жүзеге асыруға қажет машықтарды үйренді. Жоба бағдарламасында қазіргі заманға лайық ой-танымды қайта жаңғырту, жасампаздық және ниеттестікті қалыптастыру, ішкі коммуникацияны, корпоративтік мәдениетті дамыту, корпоративтік құндылықтарды қабылдап, соған бейімделу сынды мақсаттар көзделеді. Бағдарлама барысында түрлі заманауи машықтарға үйретушілер – ҚТЖ өкілдері емес, әр салада коуч болып жүрген халықаралық және қазақстандық психолог, тренерлер. Бірақ олар бағдарламаны теміржолға икемдеп, қатысушыларға бағдарлама мақсатына сай білім беруге тырысып бақты. Компанияның оқу орталығында өткен жобаның үш күндік сессияларына 450 адам қатысты. Әр күніне 150 адамнан бөлінген олар сессияларды өткізу кезінде 10 топқа бірігіп, тапсырмаларды орындады. Әр топ өзара бәсекелестікпен бірінен бірі озуға тырысты. Қатысушылар өз топтарын «Жұмбақ белгілер» атты алғашқы бөлімде таныстырды. Бұл жерде олардың креативті ойлау қабілеттері қаншалықты деңгейде екені байқалды. Арасында ұйымдастырушылар залдағыларға «Уақыт желісі» атты жаттықтырумен бой сергітті. Бірегей жоба барысында қатысушылардан ұялы телефондары арқылы menti.com сайтына кіріп, «Сіз үшін ЖАҚСЫ құндылығы деген не?» сауалнамаға қатысу сұралды. Сессияларда «ҚТЖ» ҰК» АҚ-ның ұстанатын корпоративтік құндылығы – ЖАҚСЫ, яғни жауапкершілік, абырой, қауіпсіздік, саналы озаттық, ынтымақтастық құндылықтары насихатталып, барлық тапсырмалар солардың аясында құрылды. Жоба аясында келесі тапсырма бойынша топтардың әрқайсысына 15 карточкадан беріліп, сол карточканың бесеуіне Қазақстан теміржолының өткен кезеңіндегі қуанышты және келеңсіз жайттар, тағы бір бесеуіне қазіргі жақсы және жаман тұстар және соңғы бесеуіне алдан күтетін сын-қатерлер туралы жазу тапсырылды. Сессиялардың екінші, үшінші күндерінде де «Компаниядағы қауіпсіздік мәдениетін дамытудың негізгі трендтері», «Компания туралы кейстер», «Қауіпсіздіктің 5 негізгі қатері мен шешімі», «Корпоративтік мәдениет пен құндылықтар бойынша топтық жұмыстарды қорғау» тақырыптарында тапсырмалар берілді. Жалпы жоба 2021 жылдың желтоқсаны мен 2022 жылдың наурызы аралығында өткізіліп, осы аралықта 1500 теміржолшы қамтылмақ. Келесі сессияға бөлімшелердің бірінші басшылары қатысады деп көзделуде.