ҚТЖ топ-менеджерлері «ӘТЖК 100 жыл» төсбелгісімен марапатталды
«Қазақстан теміржолшысы» газетінің тілшісі
9 желтоқсан – әскерилендірілген темір жол күзетінің құрылған күні. Биыл күзет қызметі жүз жылдығын атап өтуде. Айтулы датаға орай жер-жерде салтанатты шаралар өтіп, филиал қызметкерлерінің ерен еңбегі лайықты бағасын алуда. Жуырда «Әскерилендірілген темір жол күзеті» ЖШС бас директоры Бауыржан Наханов «ҚТЖ» ҰК» АҚ орталық аппараты мен еншілес ұйымдарының бірқатар топ-менеджерлерін «ӘТЖК 100 жыл» төсбелгісімен марапаттады. Құрылымның ғасырлық мерейтойына арналған бұл төсбелгі 2021 жылдың 15 қарашасында «ӘТЖК» ЖШС №37-п бұйрығымен бекітілген. «Әскерилендірілген темір жол күзеті – теміржол саласының бір бөлшегі. Жылдың төрт мезгілінде ауа-райының түрлі жағдайларына қарамастан, күн-түн демей теміржолдың игілігі үшін жұмыс істеп жүрген үлкен құрылым. Қазақстан аумағы арқылы өтетін барлық транзиттік жүк пойыздарын, контейнерлерді күзетіп, ондағы жүктерді шашау шығармай тиісті нүктесіне жеткізетін күзет қызметінің барлық сарбаздарын төл мерекелерімен құттықтап, еңбектеріне табыс тілейміз», – деп ақжарма тілегін білдірді марапаттаушылар атынан «ҚТЖ» ҰК» АҚ Қауіпсіздік департаментінің директоры Марат Шакенов.