«KTZ Express» АҚ-да коррупцияға қарсы іс-қимыл мәселесі көтерілді

Қоғамның келеңсіз құбылысына айналған жемқорлықпен күрес бүгінгі таңдағы ең өзекті мәселеге айналғаны рас. Елордада ҚТЖ компаниясының еншілес ұйымы «KTZ Express» АҚ сыбайлас жемқорлық белгілерін жою және алдын алу бойынша жиын өткізді, деп хабарлайды Rail-news.kz.

Жиынға «ҚТЖ» ҰК» АҚ комплаенс қызметі, «Адал жол» жобалық кеңсесінің өкілдері, сонымен қатар компанияның корпоративтік қауіпсіздігі департаменті, мүліктік құқықты қорғау департаменті мамандары да қатысты.

Клиенттерге Қазақстан және шетел бойынша жүктерді жеткізуші қызмет көрсететін мультимодальдық көлік-логистикалық компаниясының бас директоры Нұрлан Игембаев: «Қазіргі таңда сыбайлас жемқорлық – дамушы елдер үшін қауіпті салдары көп, әлемдік қауымдастықтың ең өзекті мәселелерінің бірі. Көбіне компаниялардың өздері бюрократиялық жүйе мен инстанцияның жоғары қағидаттарын аттап өтіп, осындай іс-әрекеттер жасауға жұмысшыларын өздері итермелейді. Бұл жемқорлықпен күресте анағұрлым ауқымды және шұғыл шаралар қабылдауға негіз болуда», – деді.

Ол сондай-ақ компания сыбайлас жемқорлықпен қарқынды күрес жүргізіп, «KTZ Express» АҚ-ның сыбайлас жемқорлықпен күрес саясаты» шеңберінде алдын алу шараларын енгізіп жатқанын, бұл барлық жұмыс процестерінің тиімді әрі айқын болуын қамтамасыз ететінін алға тартты.