Қытай-Литва-Еуропа жүк пойызына нәзік жанды қазақ теміржолшысының есімі берілген
«Қазақстан теміржолшысы» газетінің тілшісі
Құрметті теміржолшы, «ҚТЖ-Жүк тасымалы» ЖШС пойыздар қозғалысы кестесін жасау департаментінің бас менеджері Сәуле Қалтаева – теміржол көлігіндегі сирек мамандық иесі. Теміржолдың техникалық талдауын жүргізуші – графистер әрбір пойыздың рейске қашан шығатынын, қандай жылдамдықпен жүріп, қайда аялдайтынына дейін шешеді.
Сәуле Қалтаева теміржолға кездейсоқ келген жан емес, атасынан басталған әулеттің теміржолдағы еңбек жолын ата-анасы жалғастырып, эстафетаны үшінші буын өкілі өзі қабылдап алғалы да 37 жыл өтіпті. Алматы теміржол көлігі институтында «Тасымалды ұйымдастыру және теміржол көлігінде қозғалысты басқару» мамандығы бойынша жоғары білім алды. Еңбек жолын Целиноград станциясында бастап, Қарағанды жол бөлімшесінде станция кезекшісі, пойыз диспетчері, жедел-реттеу бөлімі бастығының орынбасары қызметтерін абыроймен атқарды. Әрі қарай еңбек жолын Ақмола жол бөлімшесінде жалғастырды.
Графистердің мойнына үлкен жауапкершілік жүктелген. Білім мен шыдамдылықты, мұқият болуды талап ететін қажырлы жұмыс. Пойыздар қозғалысының кестесі жыл сайын жасалады және күрделі пазл сияқты құрастырылады. Сәуле Маратқызының компания бойынша «тар» тұстары бар жалқы жолды телімдердің дамуына қосқан үлесі зор.
Сәуле Бурабай курорты станциясында жолаушыларды отырғызу платформаларын жаңғыртуға бастамашы болды. Сонымен қатар Қарағанды-Жолаушылар станциясында вокзалдан перрон арқылы пойыздарға қарай шығу және керісінше вокзалға кіру кезінде жолаушылардың қауіпсіз және жайлы өтуіне арналған конкорсты өтпе жолдарын (эскалатор) салуды да ұсынды.
Салаға сіңірген адал еңбегі мен сапалы қызметі үшін ол «Құрметті теміржолшы» атағына ие болып, компания басшылығы атынан бірнеше рет Құрмет грамотасы және Алғыс хаттармен марапатталды. 2020 жылы пандемия басталған кезеңде көрші елдер азаматтарын өткізудегі ұйымдастырушылық жұмыстары үшін оны Өзбекстан үкіметі Алғыс хатпен марапаттады.
2012 жылы Литва темір жолы оның құрметіне Қазақстан арқылы Қытай-Литва-Еуропа елдері бағдары бойынша жүретін контейнерлік пойызға «Сәуле» деген атау берді.