Елімізде «STADLER» заманауи вагондары шығарылмақ
«Қазақстан теміржолшысы» газетінің тілшісі
Елорда іргесіндегі индустриалдық паркте орналасқан «Тұлпар» зауытынан шыққан, көпшілікке тальго деген атпен танымал вагондар бүгінде жүрдек пойыздар құрамында еліміздің түкпір-түкпіріне қатынап жүр. Енді отандық зауыт базасында жолаушылар вагондарының өндірісі қайта жанданып, жаңа еуропалық технологиямен шығарыла бастамақ.
Бұл жолы «DB Engineering&Consulting» ұсыныстары негізінде халықаралық байқаудың нәтижесі бойынша швейцариялық «StadlerBussnang AG» компаниясы топ жарып, Қазақстанда жолаушылар вагондарын шығару жобасы бойынша серіктес деп танылып отыр.
Осы мәселеге қатысты Қазақстан Республикасының Индустрия және инфрақұрылымдық даму министрлігі «ҚТЖ» ҰК» АҚ-мен бірлесе отырып, «Stadler» компаниясымен ынтымақтастық мәселелерін талқылады. «Stadler» компаниясына келсек, ол жылжымалы құрам шығарумен 80 жылдан астам уақыт айналысады. Осы ретте, Stadler вагондарының бірқатар артықшылықтарын атап өткен жөн болар. Біріншіден, вагондарды пайдалану мерзімі 40 жылды құраса, екіншіден, еуропалық сапа стандартына сай, сондай-ақ, заманауи дизайн, оқшаулау деңгейі және жаңа технологиялар трансферті тағы бар. Мамандар, әсіресе, вагондардың отын багы көлемінің сыйымдылығы басқа өндірушілермен салыстырғанда жолаушылар пойызының құрамына автономды режимде әлдеқайда ұзақ жұмыс істеуге мүмкіндік беретінін айтып отыр. Жалпы алғанда, вагондардың техникалық сипаттамасы оларды жөндеудің жоспарлы түрлеріне ұзақ уақыт жұмсамай, яғни ағытпай-ақ жөндеу жүргізе беруге болатынын көрсетіп отыр. Құрамдар өз кезегінде үздіксіз тасымалдау процесін қамтамасыз етеді деген сөз.
Атап өтерлігі, елімізде швейцариялық вагондар өндірісін ұйымдастыру үшін жергілікті «Тұлпар» зауыты қызметкерлерінің Stadler зауыттарында біліктілігін шыңдауы жоспарланған. Бүгінгі таңда «ҚТЖ» ұлттық компаниясы «Самұрық-Қазына» акционерлік қоғамының қатысуымен қаржыландыру мәселесін пысықтап, валюталық тәуекелдерді азайту бойынша келіссөздер жүргізуде.
Еске сала кетсек, өткен жылдың қараша айында Женевада Қазақстан мен Швейцария президенттерінің қатысуымен инвестициялық дөңгелек үстел өтіп, оның аясында түрлі салаларда бірқатар коммерциялық келісімге қол қойылған болатын. Олардың қатарында «ҚТЖ» ҰК» АҚ мен Stadler арасындағы стратегиялық ынтымақтастық туралы келісім де бар.