Астана белгі беру және байланыс дистанциясы - тоқсан жылдық тарих

Астана белгі беру және байланыс дистанциясы төл мереке қарсаңында 90 жылдық мерейтойын атап өтті. Қос мереке қатар келген салтанатты жиында ардагерлерге құрмет көрсетіліп, мекеменің еңбек озаттары түрлі марапаттарға ие болды. Дистанциялықтарды бір кездері осы мекемеде еңбек жолын бастаған «ҚТЖ» ҰК» АҚ Бас инженері Батыр Котырев арнайы құттықтап барды.

Жиында дистанцияның құрылғаннан бастап күні бүгінге дейінгі тарихы арнайы дайындалған бейнеролик арқылы жұртшылық назарына ұсынылды. Бүгінде 320 адам еңбек ететін дистанция қызметі СЦБ, байланыс, радиобайланыс және КТСМ құрылғыларының ақаусыз жұмыс істеуін қамтамасыз етуге бағытталған. Себебі бұл құрылғылардың дұрыс жұмыс істеуі – теміржолдағы пойыздар қозғалысы қауіпсіздігінің ең басты кепілі. Дистанция директоры Артур Сарсенғалиев тоқсан жылдық бай тарихты жасауға атсалысқан тұлғаларға арнайы тоқталып өтіп, мекемені 2001-2004 жылдары басқарған Батыр Котыревқа сөз берді. Елорда мен оның маңайындағы станциялардың теміржол саласының жұмысын үйлестіріп, белгі беру және байланыс жүйелерімен қамтамасыз етіп отырған дистанция еңбегіне жоғары баға берген компанияның бас инженері әріптестерін қос мерекемен қатар құттықтады.  

– Мәскеуде теміржолдың жоғары оқу орнын бітіріп, 1994 жылы осы дистанцияда электромеханик болып еңбек жолымды бастағаным күні кеше секілді. Мұндағы жұмыс тәжірибем маған алдағы қызмет жолым үшін үлкен мектеп болды, білім мен білігімді шыңдады. Кейін өзім басшылық еткен жылдары дистанцияға жаңа технологиялық жабдықтар алып, автоматтандырылған жұмыс жүйесін дамытуға атсалысқанымды мақтанышпен айта аламын. Сондықтан бұл қара шаңырақ мен үшін қашан да ыстық және орны бөлек, – деді өз сөзінде Б.Котырев.  

Мерекелік жиында «Астана белгі беру және байланыс дистанциясына 90 жыл» төсбелгісімен 30 ардагер, 70 қызметкер марапатталды, бұл төсбелгі сонымен қатар Батыр Котыревке, «Магистральдық желі дирекциясы» филиалының Автоматика және телемеханика департаменті директорының орынбасары Аманжол Әміренов пен осы департаменттің бөлім басшысы Дәуір Тойбаевқа да берілді. 20 теміржолшыға дистанция басшылығы атынан Құрмет грамотасы тапсырылды. «Үздік басшы» атағына дистанция директоры Артур Сарсенғалиев, «Құрметті теміржолшы» белгісіне электромеханик Бекболат Молдашев, «ҚТЖ-25 жыл» төсбелгісіне дистанция директорының орынбасары Шоқан Баймолдаев, «Кәсіподақтың 30 жылдығы» медаліне Елубай Ысқақов, «Адал еңбегі үшін» төсбелгісіне Малдыбек Қасымбеков сынды қызметкерлер ие болды. 

Мекеме ауласында киіз үй тігіліп, келген қонақтар мерекелік дастарханнан дәм татты. Салтанатты жиынды өткізуге мекеме кәсіподағы комитетінің төрағасы Қуаныш Сайымов бастаған қызметкерлер атсалысты.