Тасымалға тапсырыс артқан
«Қазақстан теміржолшысы» газетінің тілшісі
Қазақстан, Ресей және Беларусь елдері Қытай бағытында контейнерлік тасымал көлемін арттыруды көздеп отыр. «ҚТЖ» ҰК» АҚ, «РТЖ» ААҚ, «Беларусь темір жолы» МБ басшылары арнайы кездесуде осы мәселені талқылады.
Бейнебайланыс арқылы өткен кездесу барысында Ресей мен Беларусь темір жолдарының басшылары өз елдерінен Қазақстан аумағы арқылы Қытай бағытына жүк жөнелтетіндерден тапсырыс айтарлықтай көбейгенін атап өтті. Келіссөзге қатысушылар барлық бағыттар бойынша тапсырыстар артып, транзиттік тасымал көлемі қалпына келе бастағанын мәлімдеді, бұл транзиттік теміржол сервисінің жоғары жылдамдық, жеткізу мерзімінің тұрақтылығы және клиенттер үшін ыңғайлы және таза болуы сынды негізгі параметрлерін әрі қарай жетілдіруге мүмкіндік беретінін де жеткізді.
Үш елдің темір жол компаниясы басшылары қазақстан-қытай шекарасы арқылы арта түскен экспорт көлемін өткізу бойынша ұсыныстарды бөлек талқылады. Соның ішінде Қытай темір жолымен өзара іс-қимыл бойынша шекара өткелдерінің технологиялық жұмысын жетілдіру, ұзартылған пойыздар құрастыру туралы, сонымен қатар «Аягөз-Бахты» темір жол желісі құрылысы жобасын одан әрі дамытуға бірлесе қатысу жайында сөз етті.