Мәртебелі марапат иелері

Биыл теміржолшылардың төл мерекесі – Көлік қызметкерлерінің күні Ұлттық компанияның 25 жылдығымен қатар атап өтілді. Ерен еңбегімен ерекшеленген 80-ге жуық сала қызметкері «Құрметті теміржолшы» атағына ие болып, жүздеген адам «ҚТЖ-25 жыл» мерейтойлық төсбелгісімен марапатталды.

Жұма күні ұлттық компанияның бас ғимаратындағы мәжіліс залында өткен салтанатты жиын Қазақстан темір жолының тарихы мен жетістіктеріне арналған бейнероликті тамашалаумен басталды. Келесі кезекте сахнаға көтерілген компания басшысы Нұрлан Сауранбаев барша қызметкерлерді кәсіби мерекемен құттықтап, еңбекте табыс тіледі.

– Темір жол – еліміздегі көлік саласының басты артериясы, сонымен қатар ел экономикасының дамуына зор үлесін қосып келе жатқан сала. Міне, осы салада тер төгіп жүрген жүздеген-мыңдаған теміржолшы, қызметкерлеріміз компанияның өсіп-өркендеуі жолында аянбай еңбек етіп келеді. Былтырғы табыс – соның нақты айғағы. Өткен жылы компания негізгі өндірістік көрсеткіш саналатын жүк айналымы бойынша тәуелсіздік жылдарында тарихта болмаған ең жоғары межеге қол жеткізді, бұл көрсеткіш – 239 млрд тонна км-ді құрады. Былтыр Қазақстан аумағы арқылы 1 миллионнан астам жүк тиелген транзиттік контейнерлер жүріп өтті. Биыл да осы деңгейден төмен түспеуіміз керек. Жақсы бастамаларға қолдау білдіріп жүрген әріптестеріме көп рахмет! – деген компания басшысы ел аймақтарынан келген еңбек озаттарына өз қолымен «Құрметті теміржолшы» және «ҚТЖ-25 жыл» мерейтойлық төсбелгілерін тапсырды.

«Құрметті теміржолшы» белгісін компанияның басқарма басшысының қолынан бірінші болып алған Ақмола магистральдық желі филиалына қарасты Астана белгі беру және байланыс дистанциясының сигнал беру, орталықтандыру және блоктау электр монтері Бекболат Молдашев – салада 40 жылдық еңбек өтілі бар теміржолшы. Ол сүйікті кәсібі арқылы саланы дамытуға қосқан еңбегі еленгеніне алғысын білдірді. Сондай-ақ 32 жылдық тәжірибесі бар теміржолшы, Қарағанды облысы бойынша жол қозғалысы департаментінің бас ревизоры Болатбек Әлмұрзаев та бұл марапатты тек өзіне емес, бүкіл өңір теміржолшыларына берілген баға деп түсінетінін жеткізді.

Мереке одан әрі елордадағы «Астана опера» театрында өткен салтанатты шараға ұласты. Бағдарламада «Түрксіб», «Тың» фильмдері, театрландырылған қойылымдар, «Нұрлы жол», «ҚТЖ – бір жүрек, бір отбасы», «Махаббат перронында», «Ұлы құрылыс», «Ұлы Жібек жолы» сынды эпизодтар көрсетілді.