Қазақстан Әзірбайжанмен көлік-логистикалық ынтымақтастықты дамытуға мүдделі
Қазақстан Әзірбайжанмен көлік-логистика саласындағы ынтымақтастықты дамытуға толық мүдделі. Бұл туралы Мемлекет басшысы Қ.Тоқаевтың Әзербайжан Республикасының Президенті И.Әлиевпен өткен келіссөздер қорытындысы бойынша БАҚ үшін мәлімдемесінде айтты, деп хабарлайды Rail-news.kz.
Мәлімдеме мәтіні ҚР Президенті әкімшілігінің сайтында жарияланды.
«Бүгін біз мемлекеттеріміз арасындағы ынтымақтастықтың көлік-логистикалық саласын дамыту туралы егжей-тегжейлі талқыладық. Жан-жақты талдап, екі ел үкіметтеріне тиісті тапсырмалар берілді деп айта аламыз және бұл бағытта нақты нәтижелерге қол жеткізілетініне күмән жоқ. Қалай болғанда да, Қазақстан тарапында ынтымақтастықтың бұл түрін дамытуға қызығушылық жоғары», – деп атап өтті Президент.
Сонымен қатар ол ауыл шаруашылығы саласын да атап өтті.
«Қазақстан астық, бидай және ауыл шаруашылығы өнімдерінің басқа да түрлерін жеткізуге мүмкіндігі бар екенін білесіздер. Өз кезегінде бізге Әзербайжаннан ауыл шаруашылығы өнімдерін – жеміс-жидек пен көкөністерді импорттау қажеттілігі туындап отыр. Жалпы алғанда, қазақстандық өндірушілердің бірқатары Әзербайжанға жалпы сомасы 300 миллион доллардан асатын 100 түрлі тауар көлемін ұлғайтуға дайын. Сондықтан біз осы тауар айналымның логистикасын қамтамасыз етуіміз керек және бұл біздің үкіметтеріміздің міндеті. Бүгін осы жөнінде келістік», – деді Қ. Тоқаев.