Павлодар облысында пойыз жылқыларды қағып кетті
Үй жануарлары жоғары жылдамдықпен келе жатқан пойыздарға қауіп төндіретін фактордың бірі болып тұр. Жақында Павлодар облысында қараусыз жүрген жылқылар пойызбен соқтығысып, жазым болды.
Жүк пойыздары Ерейментау – Қоржынкөл, Жолқұдық – БП-434 және Грэс-1 – Грэс-2 аралықтарында үш жылқыдан қағып кетті. Пойыз машинистері соқтығысуды болдырмауға тырысып, шұғыл тежеу қолданды, бірақ соқтығысудың алдын алу мүмкін болмады. Пойыздың жоспарланбаған тұрағы 1 сағат 20 минутты құрады.
Жүргізілген жедел-іздестіру іс-шараларының нәтижесінде Павлодар станциясындағы Желілік полиция бөлімінің қызметкерлері үй жануарларының иелерін анықтады. Олардың барлығы Павлодар облысының тұрғындары.
Осы фактілер бойынша мал иелеріне қатысты ҚР ӘҚБтК-нің 559-бабының 1-бөлігі бойынша әкімшілік хаттамалар толтырылды.
Көлік полицейлері мал иелеріне қауіпсіздік шаралары туралы тағы да еске салып, теміржолдардың жанында мал жаю кезінде мұқият болуды сұрайды.