«Алматы-Петропавл» пойызының тоқтатылуы – техникалық вагон тұтанған

2022 жылғы 21 қыркүйекте Қарағанды – Астана учаскесінің Мырза – Шоқай аралығында құрамның соңында тіркелген техникалық вагонда тұтанудың орын алуы салдарынан «Алматы-2 – Петропавл» пойызының қозғалысы тоқтатылды.

Пойыз бригадалары қызметкерлерінің лауазымдық нұсқаулықтарына сәйкес, қауіпсіздікті қамтамасыз ету мақсатында бес артқы вагоннан 50 жолаушыны (37 жолаушы құрам ішімен, 13 адам сыртқа шығарылып көшірілді) бас вагонға көшіру жүргізілді. Осыдан кейін вагондардың барлық жолаушылары пойыз құрамында болды.  

Оқиға орнына Қарағанды станциясынан өрт сөндіру пойызы келіп, тілсіз жау ауыздықталды. Зардап шеккендер жоқ.

Пойыздың барлық жолаушылары (184 адам) «Алматы – Нұр-Сұлтан – Нұрлы жол» бағытындағы №3/4 (Тальго) пойызына қайта отырғызылып, Астанаға жеткізілді. Қазіргі уақытта межелі станцияларға дейін жеткізу үшін жолаушыларды отырғызу ұйымдастырылды.  

Talgo вагондарына техникалық қызмет көрсетуді Patentes Talgo компаниясы жүзеге асырады.

Тексеріс жүргізу үшін «ҚТЖ» ҰК» АҚ комиссиясы құрылды.