Тбилисиде TХКБ-ның кезекті жалпы жиналысы өтті
Тбилисиде «ҚТЖ» ҰК» АҚ басшысы Нұрлан Сауранбаевтың төрағалығымен «Транскаспий халықаралық көлік бағдары» Халықаралық қауымдастығының (Орта дәліз, ТХКБ) отырысы өтті, деп хабарлайды Rail-news.kz.
Отырысқа Грузия, Түркия, Әзірбайжан және Қазақстан теміржол әкімшіліктерінің, кеме қатынасы компаниялары мен порттарының басшылары қатысты. Грузияның вице-премьер-министрі, экономика және тұрақты даму министрі Леван Давиташвили құттықтау сөз сөйледі.
Жиынға қатысушылар қауымдастықтың жұмысы туралы есепті тыңдап, маршруттағы тасымалдардың жалпы оң қарқының және Еуропа, Орталық Азия мен Қытай арасындағы транзиттік ағындарды қамтамасыз етудегі артып келе жатқан рөлін атап көрсетті.
Қауымдастық мүшелерінің жалпы күш-жігері арқасында 2022 жылдың 9 айында ТХКБ бағыты бойынша жүктерді тасымалдау көлемі өткен жылдың сәйкес кезеңімен салыстырғанда 2,7 есеге өсіп, 1 млн 84 мың тоннаны құрағаны атап өтілді.
Өсімнің үлкен үлесі экспортқа келеді. Бағдар бойынша Қазақстаннан экспорттық тасымалдау көлемі 7,9 есеге өсіп отыр.
Қатысушылармен орта дәліз бойынша контейнерлік тасымалдар көлемінің одан әрі өсуін қамтамасыз ету және маршрутта қолайлы жағдайлар жасау үшін бірқатар шаралар әзірленді.