Республика күніне орай теміржолшылар марапатталды

Мемлекеттік мереке – Республика күні қарсаңында «ҚТЖ» ҰК» АҚ-да 777 теміржолшы саланың дамуына қосқан үлесі үшін марапатталды,  деп хабарлайды Rail-news.kz.

Мемлекеттік наградалармен 6 теміржолшы марапатталды. Олардың ішінде «Құрмет» орденімен «ҚТЖ» ҰК» АҚ – «Магистральдық желі Алматы бөлімшесі» филиалының Үштөбе белгі беру және байланыс дистанциясы БОБ учаскесінің бастығы Ержан Тұралынұлы Жебегенов марапатталды. Ол теміржол магистралінде шамамен 45 жыл жұмыс істейді. Оның әр күні қызметтік міндеттерін өте мұқияттылықпен және сезімталдықпен орындаумен өтеді.

Салтанатты іс-шара барысында «ҚТЖ» ҰК» АҚ Басқарма төрағасының орынбасары Қанат Әлмағамбетов наградаларды тапсыра отырып, өндіріс озаттары жоғары кәсібилік, мінсіз еңбегі және теміржол көлігін дамытуға қосқан жеке үлесі үшін атап өтілгенін  жеткізді.

«Адал еңбегі үшін» салалық төсбелгісімен 110 қызметкер марапатталды. «Кәсібі бойынша үздік» атағына 94 теміржолшы, «Үздік маман» атағына 48 қызметкер ие болды. ҚТЖ-ның 39 қызметкері «Самұрық-Қазына» АҚ төсбелгілерімен, Құрмет грамоталарымен және Алғыс хаттарымен марапатталды.

Темір жол магистралінің 346-ға жуық қызметкері «ҚТЖ» ҰК» АҚ Басқарма төрағасының Құрмет грамоталарымен және Алғыс хаттарымен, «ҚТЖ» ҰК» АҚ - ға 25 жыл» мерейтойлық медалімен – 40 адам марапатталды.