Еліміздегі алғашқы полипропилен зауыты өнімін экспорттау үшін темір жол тасымалын таңдады
Атыраудағы KPI зауыты алғашқы полипропилен өнімін пойызбен экспортқа жөнелтті, деп хабарлайды Rail-news.kz.
«ҚазМұнайГаз» ҰК» АҚ мәлім еткендей, 18 қарашада Атырау қаласындағы «Kazakhstan Petrochemical Industries Inc» (KPI) ЖШС зауыты 1,5 мың тонна полипропилен тиелген алғашқы контейнерлік пойызды (62 контейнер) экспортқа шығарды. Ай соңына дейін өнімді ҚР тұтынушыларына және көлемі 9 мың тоннадан асатын тағы 6 контейнерлік пойызды экспортқа жіберу жоспарлануда.
KPI зауыты 2022 жылы 8 қарашада іске қосылды және бұл – Қазақстан экономикасындағы тұңғыш газ-химия кешені. Кәсіпорынды Мемлекет басшысы Қасым-Жомарт Тоқаев Атырау облысына сапары кезінде ашты. Зауыттың толық қуатына, яғни жылына 500 мың тонна өнімге шығуы оны әлемдік нарықта полипропилен өндіретін ірі ойыншылармен бір қатарға қояды.