Арыс қаласы мен теміржолшылар – егіз ұғым
Түркістан облысы бойынша меншікті тілші
Тоғыз жолдың торабында тұрған Арыс қаласы ежелден теміржолшылар қаласы аталып кеткен. Ғасырдан асатын тарихы бар қалаға теміржолшы кәсібі де ерте сіңген.
Бүгінгі таңда да ірі тораптық станцияда шоғырланған теміржол кәсіпорындарында еңбек ететін жергілікті тұрғындар – жүздеген жыл еңбек өтілі қалыптасқан теміржолшылар әулеттерінің ұрпақтары. Осы аптада Арыс қаласының әкімі Гүлжан Құрманбекова жергілікті теміржолшылармен кездесті. Арыс станциясының бастығы Бөгенбай Тоқсейітов бастаған басқосуда қаланың өсіп-өркендеуі мен даму жолындағы жоспар-жобалар сөз болып, оған теміржолшылардың белсенді қатысу қажеттігі айтылды.
«Арыс қаласы мен теміржолшылар – егіз ұғым. Бір-бірінен ажырамайды. Сондықтан қаланың заңды иесі ретінде сіздерден күтеріміз көп, көмектеріңізге жүгінеміз», – деді Гүлжан Мамытқызы.
Басқосуда әкімдік өкілдері халықтың әлеуметтік жағдайын жақсарту бағытында мемлекет тарапынан ұсынылатын көмектер туралы айтып, керек кеңестер берілді. Сол сияқты 2,5 проценттік несие алу арқылы жеке кәсіпті дөңгелетудің тетіктері түсіндірілді. Ағаш отырғызу мен қала тазалығына, қоғамдық орындарда жоғары мәдениет сапасын көтеруді, жас буынның тәртіп-тәрбиесіне немқұрайлы қарамау жайы да сөз болды.