Теміржолшы үшін жаңа жылды жолда қарсы алу үйреншікті жағдай – жолсерік

Жаңа жыл мерекесі елімізде ерекше аталып өтіледі. Көпшілік оны отбасылық мереке деп те атап жатады. Алайда кейбір мамандық иелері жаңа жылды қызмет орнында қарсы алуына тұра келеді. Теміржолшылар да солардың қатарында. Олар үшін жаңа жылды жол бойында қарсы алу үйреншікті жағдайға айналған. 

Жыл сайын бірнеше мың теміржолшы жаңа жылды өз жұмыстарында қарсы алады. Басты міндет халыққа қызмет көрсету, жолаушыларды діттеген жеріне аман-есен уақытында жеткізу.

«ҚТЖ» ҰК» АҚ диспетчерлері, станция, депо бойынша кезекшілер, машинистер мен олардың көмекшілері, жолшылар, жолсеріктер және ауысымдары 31 желтоқсаннан 1 қаңтар түніне түскен өзге қызметкерлер штаттық режимде жұмыстарын жалғастыра береді.

Мыңнан астам темір жол қызметкерлері мереке күніне қарамастан пойыздардың кесте бойынша қозғалуын қамтамасыз етіп, жолаушыларға қызмет көрсетеді.

Астана-Өскемен бағытындағы тальго пойызында жолсерік болып жұмыс істейтін Нұрдәулет Кеңес бірнеше рет жаңа жыл түнін жол бойында қарсы алғанын айтады. Кезекшілігі дәл мереке күнге түскеніне еш қапаланбайды, өйткені жұмысына үлкен жауапкершілікпен қарайды.

«Теміржолшы болып жұмыс істеп жатқаныма жеті жылдан асты. Соның екі-үш жылында жаңа жылды жолда қарсы алдым. Ол кезде бойдақ едім әрі Шымкен-Астана бағытында жүретінмін. Үнемі жол үстінде жүретіндіктен болар жаңа жыл күні жұмысқа түссем де әдеттегі жұмыс күні сияқты қалыпты қараймын. Жолаушыларға сапалы қызмет көрсетіп, жақсы көңіл-күй сыйлауға тырысамыз,  олардың аман-есен жетуін қадағалау басты назарда. Адамдар әртүрлі жаңа жыл түнін бірі атап өтіп жатса, тағы бірісі жатып ұйықтайды. Түнгі сағат 12 болғанда әріптестермізбен кіші-гірім дастархан жайып, әдемі тілектерімізді айтып жаңа жылды өзімізше атап өтеміз. ҚТЖ жылда жаңа жылға қарай балаларымызға тәттілер беріп, сый-сияпат көрсетеді. Жұмысым өзіме ұнайды, отбасым да қызметіме түсіністікпен қарайды», – дейді жолсерік.

Бұл күні «ҚТЖ» ҰК» АҚ дәстүрлі түрде жолаушылардың мерекелік көңіл-күйлерін көтеру үшін қолдан келгеннің бәрін жасайды. Теміржол вокзалдарында дауыс зорайтқышы арқылы құттықтаулар естіліп жатады. Пойыздарда осы жылды жолда шығарып салғысы келгендердің атына құттықтаулар айтылады.  

Мерекеге қарамастан кәсіби қызметтерін адал атқарып жүрген барлық теміржолшыларды келе жатқан жаңа жыл мейрамымен құттықтаймыз! Қажырлы еңбектеріңіздің қызығын көріп, толағай табысқа жете беріңіздер!