Техникалық сабақ өткізудің маңызы зор

Сексеуіл локомотив пайдалану депосында техникалық сабақ өткізуге ерекше көңіл бөлінеді.

Өткен жылы, мысалы, 800-ден астам техникалық сабақ өткізілді. Олардың дені жоспарлы түрде өтсе, жартысы қосымша бұйрықтар негізінде ұйымдастырылды. Депоның өндірістік оқыту шебері Мұхтар Игіліковтің айтуынша, 1 сағат 20 минутта өтетін әр сабаққа шамамен 30-40 адам қатысады.  

– Сабақтар теориялық және тәжірибелік болып бөлінеді. Өзім көбіне теориялық бағытта тежеуішті пайдалану туралы нұсқаулық бойынша өткіземін. Ал практикалық сабақтарды нұсқаушылар локомотивке апарып өткізеді. Олар тепловоздарды пайдалану туралы нұсқаулықтарға сүйенеді. Көбіне слесарьлармен тәжірибелік сабақтар өтеді. Техникалық пайдалану ережесі бойынша нұсқаулықты негізге аламыз. Сабақтар жұмыс барысында кемшілік жібергендерге арнайы ұйымдастырылады, – дейді М.Игіліков.  

Айтуынша, техсабақтың кестеден ауытқымай өтуі маңызды. Арал станциясындағы айналым депосында да алдын ала түзілген кесте бойынша айына 8-9 дәріс өтіп, тиісті қызметкерлер маневрлік жұмыстар бойынша да сабақ алады. Техникалық сабақ өтетін бөлме қажетті материалдармен жабдықталған.