Вокзалдағы сервисті көтеру мәселесі қаралды
Абай облысы бойынша меншікті тілші
Теміржол көлігі арқылы қатынайтын жолаушыларға вокзалдарда қолайлы жағдай жасалып, құқықтары сақталуы қажет. Әсіресе қыс мезгілінде жолаушы халыққа барынша сапалы сервистік қызмет көрсетілуі тиіс.
Бұл жайында жуырда Семей станциясындағы желілік полиция бөлімінде өткен дөңгелек үстел басында кеңінен сөз болды. Басқосуға Семей магистральдық желі бөлімшесі бастығының орынбасары Ерлан Битемиров, Семей теміржол вокзалының бастығы Есет Қажығұлов, ПЧ-40 жол дистанциясы бастығының орынбасары Р.Мусагитов және Семей қаласындағы Абай атындағы әуежай басшылығы қатысты.
Дөңгелек үстел барысында бірқатар мәселелер талқыланды. Атап айтсақ, қала тұрғындары мен қала қонақтарына, сырттан келетін жолаушыларға вокзалдар мен әуежайларда қолайлы жағдай жасау, әсіресе қыстың көзі қырауда ұдайы назарда болуы керектігі айтылды. Мысалы, теміржол вокзалы маңайында, перронда қар тазалау жұмыстарын ұйымдастыру қыс бойы жүргізілуі керек. Ал қойылған талаптар орындалмаған жағдайда ҚР-ның ӘҚБтК-нің 505-бабына сәйкес, яғни қалалар мен елді мекендердің аумақтарын абаттандыру қағидаларын бұзу бойынша әкімшілік жауапқа тартылатындығы туралы ескертілді.
Қазақстан Республикасының халықтың денсаулық сақтау жүйесі туралы кодексінің 159-бабының 7-бөлігінде көрсетілгендей, темекі тартуға бөлінген арнайы орын тұрғындардың санитарлық-эпидемиологиялық нормативтік құқықтық актілеріне сай жабдықталуы қажет. Десек те, бүгінде вокзалға келуші көпшілік шылым шегу үшін орналасқан арнайы орындарды елей бермейді. Тіпті кейде теміржолшылардың өзіне белгіленбеген жерде темекі тартқаны үшін желілік тәртіп сақшылары айыппұл салған жағдайлар болған. Бұл жайт та мекемелер басшылығы тарапынан ескерілуі қажет.
Айта кетерлігі, Абай облысының орталығы мәртебесін алған Семей қаласына келетін жолаушылар саны жылдағыдан анағұрлым арта түскен. Бұл вокзал шаруашылығының жауапкершілігін арттыра түскен. Ендігі аралықта бөлімшеге қарасты барлық теміржол вокзалдарындағы құқықтық тәртіп пен санитарлық тазалық шараларын қадағалау жұмыстары күшейтілген түрде жүргізілетін болады. Осы орайда жиынға қатысушыларға тәртіп сақшылары тарапынан бірқатар маңызды ақпараттар беріліп, нұсқаулар айтылды.