Пойызда санитарлық талаптар сақталып жатыр ма?

Пойызға мінген адам шәй ішу үшін қайнаған суды, жуынып-шайынуға техникалық суды тұтынумен қатар, төсек-орын жабдықтары мен қажеттілігі үшін жолсеріктерден ыдыс алып пайдалануы мүмкін.  Ал бұл дүниелердің  сапасы мен тазалығына кім кепілдік береді?

Маңғыстау бөлімшелік көліктегі санитарлық-эпидемиологиялық бақылау басқармасының мамандары қай жерде болмасын жеке гигиена мен санитарлық талаптар сақталуы қажеттігін ескертеді. «Ауру астан...» демекші, өткен жылғы анықталған деректерге қарасақ, кейбір нәрселер біз ойлағандай «судан таза, сүттен ақ» болмай шыққан. Басқарма былтыр 43 нысанда тексеру жүргізуді жоспарлаған. 21 тексерістің нәтижесінде 6 нысаннан 10 бұзушылық анықталып, кейбіріне қомақты айыппұл салынған.  

– Өткен жылғы тексерістер қорытындысы бойынша анықталған «Маңғыстау-Атырау» және «Маңғыстау-Семей» бағытындағы жолаушылар пойызынан алынған су сынамаларының санитарлық талаптарға сай келмеуі, вагондардың ыдыс-аяқтарынан алынған шайындылардан ішек таяқшалары бактериясының анықталуы, медициналық қобдишадағы дәрілердің жарамдылық мерзімінің өтіп кеткені, вагондарда ылғалды тазалық жұмыстарының сапалы жүргізілмеуі сияқты бұзушылықтарға қатысты Жолаушылар тасымалының «Батыс» аймақтық филиалына айыппұл салынды. Лауазымды тұлға 352 245 теңге, жеке тұлғалар, оның ішінде жолсеріктер санитарлық қағидалардың талаптарын бұзуына байланысты 183 780 теңге айыппұл төледі. Сол сияқты «СарыАрка Компани» ЖШС қарасты «Маңғыстау-Бейнеу» бағытына жүретін жолаушылар пойызында да   санитарлық талаптардың бұзылуына байланысты жеке тұлғаларға 91 890 теңге мөлшерінде айыппұл салынды. Осы аталған деректерге қатысты  бұзушылықтарды жою жөніндегі мекеме басшыларына 5 нұсқама беріліп, орындалуы тексерілді. Яғни вагондардың су жүйелері залалсыздандырылып, жуылды. Ыдыс-аяқтар да залалсыздандырылып, қайта сынамасы алынды. Жоғарыда айтылған кемшіліктердің бәрі жойылды, – дейді Маңғыстау бөлімшелік көліктегі санитарлық-эпидемиологиялық бақылау басқармасының өкілі Ағзия Бөрібайқызы.