Әсем десе, Әсем!

Үш бағытта қызмет көрсететін Жаңа-Семей жүк станциясына түсетін салмақ аса ауқымды. Жүк пойыздарын сұрыптау жұмыстары үзіліссіз жүргізілетіндіктен теміржолшылар үшін жауапкершілік те жоғары. Әйтсе де, ұжымда абыроймен еңбек етіп жүргендер қатарында қыз-келіншектер үлесі мол.

Солардың бірі – Жаңа-Семей станциясындағы тасымалданатын құжаттарды өңдеу жөніндегі оператор болып еңбек ететін жаңа толқын өкілі Әсем Қазезова. Оны әріптестері тек білімді маман ғана емес, топжарған спортшы, еріктілер ұйымының белсендісі және әсем де әдемі әйел заты ретінде таниды.  

– Темір жол ел экономикасына өлшеусіз үлес қосып жатқан маңызды сала болғандықтан өз қызметімді абыроймен атқару негізгі парызым деп білемін. Қызығы мен шыжығы біте қайнасқан бұл мамандық темірдей тәртіпті талап ететіні айтпаса да түсінікті. Мәселен, жүк тасымалдауда нұсқаулықсыз әрекет етіп, бір ғана қателік жіберу арқылы ел экономикасына орасан зор шығын әкелуің мүмкін. Бағасы миллиардтармен есептелетін миллиондаған тонна жүкке жауапты болу оңай шаруа емес. Осы жерде тасымалданатын құжаттарды өңдеу жөніндегі оператордың нұсқаулығын басшылыққа алу, оның әр бөлімін жіті тану, керек десеңіз көбейту кестесі сияқты жаттап алу аса маңызды. Сол арқылы қауіпсіздікті нысанаға ала отырып, ұқыптылық, жауапкершілік, талаптылық, сабырлылық секілді қасиеттер арқылы кәсібилік пен шеберлікке жетуге болады, – дейді Әсем.  

Әсем Қанатқызының сан түрлі қыры барын айттық. Ол теміржол саласын дамытуға және тиімді жұмыс істеу мақсатында өткізілетін түрлі семинарлар мен жастар басқосуларының ұйымдастырушысы. Мәселен, Семей ЖТ бөлімшесінің Жастар ұйымы қолға алған қайырымдылық жәрмеңкесін ең алғаш жүзеге асырушылардың бірі Әсем екенін көпшілік біле бермейді. Бір бұл емес, «Ораторлық өнер», «Үздік білгір», «Проф сом» және т.б. кәсібилікті анықтайтын сайыстарда қатарының алды болып, жүлдегер атануы да Әсемнің әмбебаптығының айқын көрінісі.  

Түрлі жиындарда пікір білдіріп, жастар атынан ұсыныс-тілек айтып жүретін Әсем Қанатқызының отандық теміржол саласын дамыту бойынша да өзіндік ізденістері, түйген пайымы бар.  

– Кейде дамыған мемлекеттердің автоматтандырылған жабдықтарын көргенде, біз де осындай мүмкіндіктерге қол жеткізсек деген тілек пайда болады. Болашақта теміржолшыларды мобильді оқыту бойынша шет елдерге жіберуді ұсынғым келеді. Бұл жастар үшін мотивация болатыны айдан анық, – дейді Әсем.  

Десек те, бүгінгі таңда Семей ЖТ бөлімшесі бойынша жүк айналымы операцияларын жүргізу бойынша Жаңа-Семей станциясы көш басында келеді. Мұнда Данияр Сарқытбекұлы басшылық ететін берекелі ұжымда еңбек етіп жүрген 43 қыз-келіншектің үлесі мол екені даусыз.