Балалар теміржол көлігінің әліппесімен танысты
Маңғыстау облысы бойынша меншікті тілші
Мамандық таңдау – адам өміріндегі ең маңызды қадамдардың бірі. Кейбіріміз бұл тұрғыда қателессек, енді біріміз сәтті қадам жасап жатамыз. Мектеп табалдырығында жүргенде-ақ «Кім болам?» деген сауал алдымыздан шығады.
Жуырда Ақтау көлік колледжіне барған балақайлар да өздерін жаңа кәсіп иесі ретінде танып көрген болса, ғажап қой. Колледждің ұйымдастыруымен №12 жалпы білім беретін орта мектептің 1-сынып оқушылары «Жол сақшыларының жұмыс процесі» экскурсиясына, ал «АсметҰлас» инновациялық мектеп-гимназиясының 1-2 сынып оқушылары «Теміржолшы балақай» атты колледждегі ашық дәрістерге қатысып, ұстаздардың сабағын тыңдады. Бастауыш сынып оқушылары теміржолшы кәсібінің алғашқы әліппесімен танысып, өздері мініп, дауысын естіп жүрген пойыздың қалай жүретінін, онда қауіпсіздікті сақтаудың қандай маңызды екенін көзбен көріп, көңілге тоқыды. Іс-шара М.Тынышбаев атындағы ҚазККА Ақтау көлік колледжінің ұйымдастыруымен «WorldSkills-2023» қозғалысы аясында «Кім болғым келеді?» мамандық таңдау фестивалінің «BabySkills» жобасы бойынша өтті.
– Жобаның мақсаты – балаларды жастай теміржол көлігінің әліппесімен таныстырып, техникалық шығармашылығын дамытуға, болашақта мамандық таңдауда білімін жетілдіруге ықпал ету, кім біледі ертеңгі күні осы балақайлардың арасынан талай теміржолшылар шығар, – дейді шараны ұйымдастырушылар.