Жемқорлық – қауіпті індет

Жаңалықтар

28.04.2017, 12:29

Мемлекеттік қызмет істері және жемқорлыққа қарсы іс-қимыл агенттігінің Астана қаласы бойынша департаменті, «Нұр Отан» партиясы, «Жаңару» жемқорлыққа қарсы қоғамдық қозғалыс» РҚБ Астана филиалының өкілдері Жемқорлыққа қарсы мәдениетті қалыптастыру тақырыбы бойынша «ҚТЖ» ҰК» АҚ қызметкерлерінің басын қосқан жиын өткізді. Жиынды ашқан «ҚТЖ» ҰК» АҚ Адами ресурстарды басқару департаментінің директоры Нұржан Жапарқұл теміржол саласында сыбайлас жемқорлыққа қарсы күрес бойынша іс-шаралар қабылданып, осы бағытта ауқымды жұмыстар жүргізіліп жатқанын мәлімдеді. Алғашқы болып сөз алған Мемлекеттік қызмет істері және жемқорлыққа қарсы іс-қимыл агенттігінің Астана қаласы департаментінің директоры Тілеген Каскин қазір жер-жерде өтіліп жатқан «Пара беру – бас бостандығыңнан айырады», «Парақорлық – балалардың арманын ұрлау» атты акциялардың мақсаты, әрбір қазақстандыққа сыбайласқан жемқорлыққа қарсы күрестің маңыздылығын түсіндіріп, қоғамға қауіпті жат құбылыстың күнделікті өмірге кірікпеуін насихаттау екенін атап өтті. «Бүгін Астанада сыбайлас жемқорлыққа қарсы мобильдік топ жұмысын бастады. Өздеріңіз білесіздер, Елбасы биылғы Қазақстан халқына жолдаған Жолдауында сыбайлас жемқорлықпен күреске басымдық берді. Жемқорлық құдды індет сияқты. Оның дендеп кіріп, мысқылдап шығуына жол бермеуіміз керек. Ол біздің балаларымыздың болашағына қауіп төндіреді. Әрбір азаматтың өмірлік ұстанымы мен түсінігінде сыбайлас жемқорлыққа қарсы көзқарасты қалыптастыру – басым бағыттардың бірі болуы керек. Мемлекеттілік пен қоғамның моральдық негізін құрдымға батыратын жат қылыққа қарсы күрес негізін әрбір қазақстандық жете түсінуі тиіс»,– деді Тілеген Каскин. Кездесуде сөз алғандар өз ойларын ортаға салып, соңғы үш-төрт жылда сыбайлас жемқорлыққа жол беріп, мемлекеттік бюджеттен бөлінген қаржыны жымқырған мемлекеттік шенеуніктердің аты аталып, түсі түстелген, түрмеге тоғытылған көріністерінен бейнероликтер көпшілік назарына ұсынылды. Сыбайлас жемқорлыққа қарсы жедел топ «ҚТЖ» ҰК» АҚ құрылымдық бөлімшелері мен аймақтардағы кәсіпорындарында да кездесулер өткізуді жоспарлап отыр.

Жемқорлық – қауіпті індет

Басқа да жаңалықтар

Қазақстан теміржолшысы газеті, №34-35 01 мамыр 2026 жыл