Теміржолшыларға жат діни ағымдар бойынша түсіндіру жұмысы жүргізілді
Маңғыстау облысы бойынша меншікті тілші
Нұр-Мүбарак университетінің ұстазы Маңғыстау теміржолшыларымен кездесті. Маңғыстау қосалқы бөлімінің бас ғимаратында өткен аталған басқосуды Ақтау қалалық «Боевое братство» ҚБ әлеуметтік жобасын жүзеге асыру ясында ұйымдастырды.
Жиын барысында теология ғылымының докторы, дінтанушы, аталған университет ұстазы Мұхан Исахан діни мәселелер бойынша баяндама жасап, өз білгенімен бөлісті. Экстремистік идеологияға қарсы бағыт бойынша түсінік беріліп, жалпы қоғамдағы осы тақырып төңірегіндегі әңгімелер қозғалды.
– Қазіргі кезде әлемдегі ең өзекті мәселелердің бірі – діни экстремизм және терроризм екені белгілі. Сондықтан кездесуде осы тұрғыда алдын алу бағытында іс-шаралар өткізу жайы сөз болды. Діни экстремизм қоғамда қалыптасқан діни құндылықтар мен ұстанымдарды мойындамау және соған қарсы «идеяны» агрессивті түрде насихаттау қиындық келтіруде. Жиын барысында сондай ағымдарға алданып қалмау керектігі айтылды. Қатысушылар өздерін қызықтырған сұрақтарына да жауап алды, – дейді қоғамдық бірлестік төрағасы Мәтжан Шаулиев.
Кездесу соңында «Боевое братство» ҚБ дайындаған «Деструктивті діни ұйымның құрығына түспеу» туралы үнпарақтар таратылды.
