Күн тәртібінде – тежегіш тақырыбы

Жаңалықтар

12.05.2017, 17:41

Семей локомотив пайдалану депосында локомотив, вагон және қозғалыс шаруашылығы қызметкерлерінің қатысуымен автотежегіштерді пайдалану жөнінде конференция өтті. Оған локомотив пайдалану деполарының машинистері және вагон пайдалану деполарының вагон қарап-жөндеушілері қатысып, тежегіштерді пайдалануға қатысты нұсқау талаптарының бұзушылықтарын талқылады. Нұсқаушы-машинист Ерлан Сәрсекенов бұл туралы нақты деректер келтірді. Ал вагон депосының нұсқаушысы Қуат Шалтаевтың айтуынша, вагон пайдалану депосының мамандары мен локомотившілердің арасында тежегіш жұмысына қатысты түсініспеушілік жиі орын алады. Жиында осы мәселе көп сөз болып, ортақ мәмілеге келіп, шешімін табу жолдары қарастырылды. – Жылжымалы құрамның автоматтық тежегіші ерекше жағдайда пайдаланылып, қозғалыс жоғары жылдамдықта болғанда, қолайсыз ауа райында, үзіліссіз жұмыста, пойыздың ауыр салмағында пойыздың қозғалыс қауіпсіздігін қамтамасыз етуі тиіс. Ол үшін ең басты талап – тежегіш құрылғының сапалы жөндеуден өтуі, – деді Семей локомотив пайдалану депосының директоры Дәулет Ыдырысов. Әлемде темір жол көлігінде автоматикалық-пневматикалық тежеуіш пайдаланылады. Бұл тежеуіш магистральдық темір жол қысымының төмендеуі немесе жоғарылауы кезінде пойызға тіркелген вагон тежеуіштерін басқарады. Жылжымалы құрамда тежеуіш құрылғысын пайдалану, жөндеу, оған қызмет көрсету үшін бұл құрылғыны машинистер бес саусағындай меңгеруі керек. Локомотив пайдалану депосының бастығының сөзіне қарағанда, автотежеуішті дұрыс басқару пойыздар қозғалысының қауіпсіздігін қамтамасыз етуге және апатсыз жұмыс істеуге кепілдік береді. Осы ретте, локомотившілерге автотежеуіштерді басқару жөніндегі жергілікті нұсқаулық талаптарын бұлжытпай орын-дау абзал. Ал, тежеуішті техникалық тексеруден өткізу және жөндеу жұмыстары туралы қатысушыларға вагон депосының бастығы Әсет Сүлейменов баяндап берді. Сонымен қатар қосалқы бөлшектердің жетіспей жатқандығын, соған қарамастан қолда бар мүмкіншіліктерді пайдаланып, тығырықтан шығу жолдарын қарастырып жатқанын да жасырмады. Пойыз құрамаларына негізінен қызметтік, толық қызметтік және шұғыл қызметтік тежегіш түрлері қолданылады екен. Мысалы алдыңғысы жылдамдықты тексеру үшін қолданылса, екіншісі тезірек тоқтауға, ал соңғысы оқыс жағдайда, тосыннан болған кедергі кезінде қолданылады. Жиынға қатысушылар осындай басқосулар жиі өткізілсе, локомотившілер мен вагоншылар арасындағы ортақ проблемаға айналған мәселелердің шешімін табуға септігін тигізеді деген пікір білдірді.Конференцияға қатысушылардың ұсыныстары хаттамаға енгізіліп, жергілікті жердің құзырындағы мәселе-лер шешімін тауып, ал басқа маңызды мәселелер есепке алынып, жоғарғы органның қарауына жіберілетін болды. Шара соңында жыл басынан бергі төрт айда өз мамандықтары бойынша нәтижелі жұмыс көрсеткен бірнеше машинист пен вагоншы мақтау қағаздарымен марапатталды.

Күн тәртібінде – тежегіш тақырыбы

Басқа да жаңалықтар

Қазақстан теміржолшысы газеті, №19 13 наурыз 2026 жыл