Машинистің соңғы рейсі
«Қазақстан теміржолшысы» газетінің тілшісі
Әріптестері алматылық машинист Сергей Фоминыхты құрметті зейнеткерлікке ерекше жағдайда шығарып салды. Ол зейнетке шығар алдындағы ең соңғы рейсінен оралғанда тосынсый кұтіп тұрды...
Алматы вокзалының дикторы 1-жолға келіп тоқтаған Қостанай – Алматы жолаушы пойызының машинисі Сергей Фоминыхтың соңғы сапардан оралғанын салтанатты жағдайда хабарлады. Ал әріптестері алдынан гүл шоғымен қарсы алды.
Біліктілігі екінші класты, 34 жылдық тәжірибесі бар Сергей Викторұлы машинистерге берілетін жеңілдетілген салалық зейнетақыны пайдаланып, темір жолдағы еңбек жолын осылай аяқтады. Өзі еңбек ететін Алматы локомотив пайдалану депосы ұжымы оның иығына шапан жауып, бағалы сыйлықтарын беріп, қимастықпен шығарып салды.
Еңбек жолын 1985 жылы осы депода слесарь-жөндеуші болып бастаған ол бес жылдан кейін машинист көмекшісі болды. 11 жылдан кейін машинист біліктілігін алып бүгінге дейін абыроймен еңбек етті. Депо бастығы Айдын Сатыбалдин барлық әріптестері атынан Сергей Викторұлына ізгі тілектерін білдірді.
– Сіздің өнегелі өмір жолыңыз әріптестеріңіз бен кейінгі буынға үлгі болады. Қазақстан теміржолын дамытуға қосқан үлесіңіз үшін алғысымыз шексіз. Ұрпақтар сабақтастығы жалғасын тауып, сіз сияқты сала майталмандарымен байланыс үзілмейді деген сенімдеміз, – деді депо бастығы.
Зейнеткер машинистің екі баласы да әке жолын қуып, машинист болып еңбек етуде. Әкенің ендігі бақыты – сол ұлдарына одан әрі жол көрсетіп, немерелерін қызықтап, ардақты ата болу.