Қызылордада экология айлығы жалғасуда
Қызылорда облысы бойынша меншікті тілші
Аймақ теміржолшылары көктем басталғалы апта сайын сенбілікке шығып, экология айлығына үлестерін қосуда. Өткен аптада Қызылорда магистральдық желі бөлімшесінің жеке құрамы бөлімше ғимаратының ауласына тазалық жұмыстарын жүргізді.
Ербол Сәулебеков басқаратын магистральдықтар ең алдымен аула ішіндегі ағаштардың бей-берекет өскен бұтақтарын кесіп ретке келтіріп, әйелдер түбін ақтап шықты. Осыған дейін де әлденеше рет тазаланған ауладан тағы да бірнеше қап қоқыс шығарылып, бордюрлер мен белгілер сырланды. Айнала арамшөптерден тазартылып, биылғы жауын-шашынның әсерінен пайда болған ой-шұқырлар күрекпен тегістелді.
– Айналамыздың экологиялық жағдайын жақсарту өзімізге пайдалы, сондықтан тек тазалық айлығында ғана емес, жазға дейін сенбіліктерді жиі өткізіп тұрамыз. Өткен апта соңындағы сенбілікке бөлімшенің жеке құрамы жұмылып, талай жұмыс атқарылды, – дейді кәсіподақ ұйымының төрайымы Салтанат Махмутова.
