ҚТЖ мен Мерсин халықаралық порты Орта дәлізді дамыту аясындағы ынтымақтастықты талқылады
Анкарада Қазақстан Республикасының Президенті Қасым-Жомарт Тоқаевтың Түркияға ресми сапары аясында «Қазақстан темір жолы» ҰК» АҚ Басқарма төрағасы Талғат Алдыбергенов пен Мерсин халықаралық портының бас директоры Аджай Кумар Сингхпен кездесу өтті, деп хабарлайды Rail-news.kz.
Кездесу барысында тараптар Транскаспий халықаралық көлік бағытын (ТХКБ) дамыту, сондай-ақ Азия мен Еуропа арасындағы тиімді мультимодальды логистикалық шешімдерді құру мәселелерін талқылады.
Талғат Алдыбергенов Қазақстан тарапынан бұл бағыттағы жоғары қызығушылықты атап өтіп, тұрақты жүк ағындарын қамтамасыз етуге дайын екенін жеткізді. Сондай-ақ ол Мерсин портының Орта дәліз бойынша жүктерді өңдейтін негізгі хаб ретіндегі стратегиялық маңызын ерекше атап өтті.
Келіссөздер кезінде порттың жүк көлемінің артуына дайындығы және жүк өңдеу қуаттарын кеңейту мәселелері қарастырылды.
Логистикалық тізбекті тиімді ұйымдастыру мақсатында Қазақстан тарапы Мерсин портына «ҚТЖ» ҰК» АҚ мен PSA International-дың бірлескен кәсіпорны – KPMC-нің әлеуетін пайдалануды ұсынды. Аталған кәсіпорын қазіргі уақытта Қытай – Түркия (Измит, Косекөй), Сиань – Ыстамбұл бағыттарымен қатар, Циндао – Хоргос – Сергели бағытындағы блок-пойыздар арқылы мультимодальды тасымалдарды белсенді жүзеге асыруда.
Кездесу соңында тараптар бірлескен жұмыстар елдер арасындағы сауда-экономикалық әріптестікті нығайтуға және өңірдің транзиттік әлеуетін толық ашуға мүмкіндік беретініне сенім білдірді.