ҚТЖ Қытайға өсімдік майын тасымалдаудың жаңа форматын іске қосты
ҚТЖ күнбағыс майын флекситанк көмегімен 40 футтық контейнерлерде алғашқы жөнелтуді жүзеге асырды, деп хабарлайды Rail-news.kz.
Пилоттық партия Предгорная станциясынан (Шығыс Қазақстан облысы) Достық-Алашаңқай шекара өткелі арқылы Нантун қаласына (Цзянсу провинциясы, ҚХР) жөнелтілді.
Флекситанктер – бұл контейнерлер ішіне орналастырылған икемді резервуарлар. Олар 26 тоннаға дейін сұйық жүктерді тасымалдауға мүмкіндік береді, бұл жүктің сенімді қорғалуын қамтамасыз етеді және ағып кету мен ластану қаупін азайтады.
Жөнелту рәсіміне ҚТЖ және Майлы дақылдарды қайта өңдеушілер ұлттық қауымдастығының өкілдері қатысты.
«ҚТЖ» ҰК» АҚ 2020 жылдан бастап флекситанкаларды пайдалана отырып, 20 футтық контейнерлерде өсімдік майларының экспортын белсенді дамытып келеді, бұл қазақстандық май өнімдері үшін аса ірі нарыққа жеткізу көлемінің өсуіне ықпал етеді. 40 футтық контейнерлерде жаңа жөнелту экспорттық тасымалдауды кеңейту үшін қосымша мүмкіндіктер ашады. Соңғы бес жылда Қытайға өсімдік майларын жеткізу 10 есе өсті.
Жоба 2025 жылғы маусымда Чжэнчжоуда ҚТЖ мен «Қытай темір жолдары» мемлекеттік корпорациясы арасындағы тасымалдауды ұйымдастыру және маркетинг жөніндегі сарапшылар тобының кеңесінде қол жеткізілген уағдаластықтар шеңберінде іске асырылды.
Контейнерлерді флекситанктермен жарақтандыру бойынша техникалық жұмыстарды Қазақстан мен Қытайдың теміржол әкімшіліктерінің талаптарына толық сәйкес осындай жабдықты орнатуға маманданған қазақстандық компания орындады.
ҚТЖ — «Интеграцияланған жоспарлау дирекциясы» филиалының өкілі Қайрат Жұмабаев атап өткендей, флекситанктарды пайдалану тасымалдау шығындарын едәуір қысқартуға, тиеу және түсіру процестерін жеделдетуге, сондай-ақ экспорттық-импорттық операциялардың тиімділігін арттыруға мүмкіндік береді.
ҚТЖ инновациялық логистикалық шешімдерді дамытуды, тасымалдау процестерін оңтайландыруды және жаңа экспорттық бағыттарды ашуды жалғастыруда, бұл Қазақстанның халықаралық нарықтардағы ұстанымын нығайтуға және ұлттық экономиканың өсуіне ықпал етеді.
