ҚТЖ, ГТЖ және қазақстандық экспорттаушылар жаңа мүмкіндіктерді талқылады
«Қазақстан темір жолы» ҰК» АҚ-да «Грузин темір жолы» АҚ (ГТЖ), грузин терминалдары, порттары (APM Terminals, Pace Georgia) өкілдерінің және қазақстандық жүк жөнелтушілердің қатысуымен дөңгелек үстел өтті, деп хабарлайды Rail-news.kz.
Кездесу ынтымақтастықты дамытуға және Грузия бағытындағы тасымалдардың тиімділігін арттыруға бағытталған ашық және сындарлы диалог форматында өтті. Талқылаудың негізгі тақырыбы экспорттық тасымалдарды ұйымдастыру, жүк ағындарын болжау, сондай-ақ теміржол әкімшіліктері мен жүк жөнелтушілер арасында тұрақты және жүйелі кері байланыс құру мәселелері болды.
Дөңгелек үстелге осы бағыттағы мұнай мен мұнай өнімдерін, қара және түсті металдарды, астық жүктерін және басқа да өнімдерді жөнелтуді жүзеге асыратын ірі қазақстандық экспорттаушылар қатысты. Спикерлер Грузия бағытындағы тасымалдар Қазақстанның логистикалық жүйесінде, оның ішінде ТХКБ желісі бойынша ерекше орын алатынын атап өтті.
Отандық жүк жөнелтушілер ашық диалог форматын жоғары бағалап, мұндай алаң ҚТЖ, ГЖТ және грузин терминалдарының өкілдеріне толғандыратын сұрақтарды тікелей қоюдың нақты мүмкіндігіне айналғанын атап өтті. Қатысушылар ашықтық пен жедел кері байланыстың маңыздылығын атап өтіп, ұйымдастырушыларға сындарлы талқылау және өзекті мәселелерді бірлесіп шешуге дайындығы үшін алғыс білдірді. Мұндай кездесулер, жүк иелерінің пікірінше, сенімді нығайту, логистикалық процестерді жақсарту және қазақстандық экспорттың бәсекеге қабілеттілігін арттыру үшін қуатты құрал болып табылады.
Айта кетсек, осы жылдың 9 айында Қазақстан мен Грузия арасында жіберілген және қабылданған тасымалдау көлемі шамамен 2,85 млн тоннаны құрады, оның ішінде Грузия аумағы арқылы экспорттық қатынаста – 2,1 млн тоннадан астам. Бұл көрсеткіштер қазақстандық жүк жөнелтушілердің Грузия арқылы өтетін маршруттарға деген тұрақты қызығушылығын растайды. Қазақстандық астықты тасымалдауда 80 есе (3 - тен 240 мың тоннаға дейін), түсті металдардың 10% өсуі байқалады.
