ӘТЖК-да Конституцияны талқылау
«Қазақстан темір жолы» ҰК» АҚ құрылымдық бөлімшелері мен филиалдарында алдағы республикалық референдумға арналған ақпараттық-түсіндіру іс-шараларын өткізу жалғасуда, деп хабарлайды Rail-news.kz.
Аталған кездесулердің басты мақсаты – мыңдаған мүшесі бар теміржол ұжымына Қазақстан Республикасының жаңа Конституциясы жобасын, сондай-ақ жалпыұлттық дауыс беруге саналы түрде қатысудың маңыздылығын түсіндіру.
Бүгін еліміздің теміржол инфрақұрылымы қауіпсіздігін қамтамасыз ететін ҚТЖ бөлімшесі – Әскерилендірілген теміржол күзетінде (ӘТЖК) тиісті іс-шара өтті. Ұйым басшылығының және ӘТЖК барлық аумақтық филиалдарының қатысуымен өткен кездесу барысында елді саяси жаңғыртуға және мемлекеттің құқықтық негіздерін нығайтуға бағытталған конституциялық реформаның негізгі бағыттары егжей-тегжейлі талқыланды. Жаңартылған Конституция әділеттілік қағидаттарын бекітуге, азаматтардың құқықтарын қорғауды күшейтуге және қоғамның мемлекетті басқаруға қатысуын кеңейтуге арналған.
ӘТЖК қызметкерлері көлік-логистика саласын тұрақты дамыту және елдің стратегиялық инфрақұрылымы қауіпсіздігін қамтамасыз ету үшін базалық жағдайлар ретінде тұрақтылықтың, заңдылықтың және құқықтық қорғалудың маңыздылығын атап өтіп, талқыланатын мәселелерге белсенді қызығушылық танытты.
Мұндай іс-шаралар ҚТЖ-ның барлық өңірлік бөлімшелерінде жалғасады, осылайша болат магистралінің әрбір қызметкері толық ақпаратқа ие болады және референдум күні салмақты және саналы таңдау жасай алады.