ҚТЖ мен Wabtec стратегиялық ынтымақтастық мәселелерін талқылады
«ҚТЖ» ҰК» АҚ Басқарма төрағасы Талғат Алдыбергенов Wabtec корпорациясының басшылығымен кездесті, деп хабарлайды Rail-news.kz.
Келіссөздер барысында тараптар бірлескен жобаларды іске асырудың ағымдағы жағдайын және стратегиялық әріптестікті одан әрі нығайту перспективаларын талқылады.
Wabtec тарапынан кездесуге Global Transit Services бөлімшесі тобының Президенті Самир Гаур, ТМД, Еуропа, Таяу Шығыс және Африка бойынша Аға Вице-президенті Гохан Байхан, Еуропа, ТМД және Африка өңірлері бойынша сервистік қызмет көрсету жөніндегі Вице-президент Финтан Таффи және басқалар қатысты.
Кездесуге қатысушылар теміржол тасымалының тиімділігін арттыруға бағытталған цифрлық өнімдерді енгізу мәселелерін егжей-тегжейлі қарастырды. Локомотивтерге сервистік қызмет көрсетуге және тартқыш жылжымалы құрамды үздіксіз пайдалануды қамтамасыз етуге ерекше назар аударылды. Сондай-ақ, ағымдағы жұмыс мәселелері мен одан әрі өзара іс-қимыл жөніндегі міндеттер талқыланды.
Кездесу барысында «ҚТЖ» ҰК» АҚ Wabtec корпорациясымен стратегиялық ынтымақтастыққа үлкен мән беретіні және барлық бағыттар бойынша одан әрі бірлескен жұмысқа дайын екендігін білдіретіні атап өтілді.
