ҚТЖ үздік рационализаторларды марапаттады
«ҚТЖ» ҰК» АҚ – да Қазақстанның барлық өңірлерінен теміржол саласының қызметкерлерін біріктірген «Рационализаторлық – техникалық дамудың негізі» рационализаторлар конференциясы болып өтті. Конференция жұмысына «Ғылыми-технологиялық бастамалар орталығы» Қоры мен «Ұлттық зияткерлік меншік институты» РМК өкілдері қатысты, деп хабарлайды Rail-news.kz.
Техникалық орталық директоры Жандос Мусин атап өткендей, конференция өндірістік міндеттерді талқылауға, тәжірибе алмасуға және өңірлер арасында тиімді бастамаларды ілгерілетуге арналған алаңға айналды.
Бүгінгі таңда ҚТЖ-дағы рационализаторлық қызмет тұрақты нәтижелер көрсетуде.
Бастамалардың көп бөлігі мыналарға бағытталған:
- құрылғылардың сенімділігін арттыру
- қозғалыс қауіпсіздігін қамтамасыз ету
- еңбек жағдайларын жақсарту
- еңбекті қорғау
- технологиялық процестерді жетілдіру
- отын-энергетикалық ресурстарды үнемдеу.
2025 жылдың қорытындысы бойынша ҚТЖ-да 401 рационализаторлық ұсыныс тіркеліп, оның 84-і таратуға ұсынылды. Енгізудің экономикалық әсері 28,9 млн теңгені, авторлық сыйақы сомасы – 23 млн теңгені құрады.
Рационализаторлық қызметтегі ең үлкен белсенділікті автоматика, телемеханика және телекоммуникация департаменті, жүк тасымалы, жолдар мен құрылыстар департаменті, сондай-ақ электрлендіру және энергетика департаменті көрсетті. Ақмола өңірі бөлек атап өтілді, онда енгізілген ұсыныстардың саны орташа көрсеткіштерден екі есе дерлік артық.
Конференция аясында рационализаторлық қызмет пен техникалық шығармашылықты дамытуға үлес қосқан қызметкерлерді марапаттау болып өтті. Үздік мамандар инфрақұрылымның сенімділігін арттырғаны, жөндеу және пайдалану технологияларын жетілдіргені, еңбек жағдайлары мен қозғалыс қауіпсіздігін жақсартқаны үшін номинациялар бойынша төсбелгілермен, құрмет грамоталарымен және дипломдармен марапатталды.
Сондай-ақ, «Рационализаторлық қызметті ұйымдастыру бойынша үздік филиал» атағы Достық вагон депосына және Шалқар белгі беру және байланыс дистанциясына берілді.