Бәсекеге бейім болат бұрыштар

Жаңалықтар

23.01.2018, 12:37

Ақтөбе рельсарқалық зауытында Қазақстанда алғаш рет болат бұрыш өндіріле бастады. Өнім түрі құрылыс саласында кеңінен қолданыла бастады. Өз кезегінде аталған материал сырттан келетін импортты ығыстыруға мүмкіндік бермек. Ақтөбе рельсарқалық зауытының өндіріс жөніндегі директоры Иван Лысенконың айтуынша, болат бұрыш өнеркәсіптік ғимараттар мен тұрғын үй құрылыстарында пайдаланылады. Осыған дейін Қазақстан аумағында мұндай өнім өндірілмеген. Бұл жоба импорт айырбастауға септігін тигізеді, сонымен бірге, Ресей мен Орта Азия нарығына экспорттауға мүмкіндік береді. Жаңа өнім ГОСТ талаптарына сай келеді, оның алғашқы партиясы Ресейге жөнелтіліп үлгерген. Зауытта 120-лық құрылыс бұрыштарының 1,5 мың тоннасы өндірілген. Алдағы уақытта балкалар мен түрлі өлшемдегі швеллерлер шығарылмақ. Жалпы, Ақтөбе рельсарқалық зауытында 30-ға тарта профиль түрі, шамамен сонша фасонды өнім шығарылып келеді. Бүгінде Ақтөбе облысы өзін құрылыс материалдарымен толықтай қамтамасыз етіп отыр. 90 пайыз құрылыс өнімдері өңірде шығарылады. Артылғаны көрші елдерге экспортталады. Жергілікті өнім арасында рельсарқалық зауытынан шыққан болат бұрыштардың алатын орны ерекше. Тұтынушылар зауытта өндірілген металл бұрыштар мен арматуралардың сапасы жоғары екенін растап отыр екен. Отандық өнім сырттан жеткізілетін болат бұрыштармен бәсекеге түсе алады. Тұтынушылар тарапынан сұраныс жоғары. Кәсіпорындар да, жеке адамдар да көптеп сатып алуда. Металл сынықтарын сатушылар да жергілікті өнімді ірі көлемде сатып алып жатыр екен. Сонымен қатар, Ақтөбе облысының экспорт әлеуеті артып отыруының бір себебі осы рельсарқалық зауыты шығаратын өнімдердің Ресейге экспортталуы деп тұжырым жасауға болады. Жалпы, аймақ өткен жылы Еуразиялық экономикалық одақ нарығына 1 млрд долларға жуық тауар экспорттаған екен. Экспорт көлемінің 96 пайызы Ресейге жөнелтілген. Көрші елге металл, ферроқорытпа, сонымен бірге, жергілікті Ақтөбе рельсарқалық зауытында өндірілген өнімдер экспортталған. Сонымен бірге, мұнай, мұнай өнімдері, хром және мыс рудалары да шығарылып жатыр. Мұның бәрі облыстың экспорттық әлеуетін арттырумен қатар Ақтөбе теміржолының тасымал көлемін де ұлғайтуға септігін тигізіп отыр.

Бәсекеге бейім болат бұрыштар

Басқа да жаңалықтар