Ауған батырларын еске алды

Жаңалықтар

16.02.2018, 18:37

Биыл 15 ақпанда кеңес әскерлерінің Ауған жерінен шығарылғанына 29 жыл толады. Осыған орай Семей қаласында Ауған даласында қаза болған интернационалист жауынгерлерге арналған ескерткіш басында митинг болып өтті. Қала бойынша өткен шарадан теміржолшылар да тыс қалмады. «ҚР теміржолшылар кәсіподағы» қоғамдық бірлестігінің Семей өңірі бойынша өкілі Алик Досанов бастаған ауған соғысының ардагерлері – теміржолшылар қатысты. Шаһардағы барлық мекемелер мен ұйымдар өкілдері жиналған ауқымды шарада теміржолшылар қауымы ескерткіш-монументке алғашқы болып гүл шоқтарын қойды. Оның себебі де бар. Жат жерде жауынгерлік борышын өтеп, елге аман оралып, салалық қызметте елеулі еңбек сіңіріп жүрген бүгінгі ауған соғысы ардагерлерінің басым көпшілігі теміржолдың түрлі саласында тер төгіп жүрген теміржолшылар екен. Семей ЖТ бөлімшесінің кәсіподақ ұйымы төрағасы Асхат Жармұхамбетов айтып өткендей, оларға қазіргі күні ұжымдық шарт аясында нақты көмек көрсетіліп, тиісті қамқорлық жасалып отыр. Ал бүгінгі ұйымдастырылған шараға оннан аса байырғы интернационалист-жауынгерлер – бүгінгі теміржолшылар келіп, ұрыс даласында мерт болған қаруластарын бір минут үнсіздікпен еске алды.

Ауған батырларын еске алды

Басқа да жаңалықтар