Тыңдайтын құлақ болса...

Жаңалықтар

27.02.2018, 11:47

Темір жолдың қауіпті аймақ екенін ұмытып, жолдың өтуге рұқсат етілмеген тұсынан кесіп өтетін жаяу жүргіншілер қауіпсіздігі үшін Маңғыстау станциясы кезекті рейд өткізді. Түбек темір жолының қақпасы Маңғыстау станциясының жолдарында қауіпсіздік аншлагтары мен жолдан өту белгілері толықтай бар. Атап айтқанда, «Қызмет жолы», «Сақ болыңыз!», «Өміріңізге қауіпті!», «Теміржолды белгіленген арнайы өткелден өтіңіз!», «Берегись поезда», вагондар өтетін жерде «Начало пропуска», «Конец пропуска», габаритті емес орындарда «Негабаритное место», «Теміржол – аса қауіпті аймақ» деген секілді ескертпелер ілінген. Оған қосымша тақ және жұп алқымда «Өмірге қауіпті!», «Теміржолдың үстімен жүрмеңіз!», «Абайлаңыз, жолымды қысқартамын деп жүріп, өміріңізді қысқартып алмаңыз!», «Темір жолмен жүру қауіпті», «Поездан сақтан!» деген жазулары бар плакаттар да ілінген. Алайда осыншама ескертулерге қарамастан жолдың арғы бетіндегі ауылдар тұрғындары бәрібір жолдан өту ережесін сақтамай отыр. Маңғыстау станциясы еңбек қорғау және техникалық қауіпсіздік инженері Айгүл Аяпованың айтуынша, станцияның бас инженері Б.Исатаев, қозғалыс қауіпсіздігі жөніндегі бас маманның міндетін атқарушы А.Шарапатдинов басы-қасында жүріп, сонымен қатар желілік тәртіп сақшылары, әскерилендірілген күзет қызметі, вагон, жол шаруашылығы өкілдері қатысқан осы рейд барысында жолдан өту ережесін бұзған 7 адам тіркелген. Рейдке атсалысқан теміржолшылар ереже бұзғандармен жеке-жеке сөйлесіп, түсіндіру жұмыстарын жүргізді. Оларға екінші рет заң бұзған жағдайда ҚР «Әкімшілік құқықбұзушылық туралы» кодексінің 559-бабына сәйкес жаза қолданылып, айыппұл салынатыны қатаң ескертілді. Рейд барысында, сондай-ақ, теміржол бойында жатқан Дәулет, Қызылтөбе ауылдарының үлкен-кіші тұрғынымен де түсіндіру жұмысы жүргізіліп, жол бойында абай болуы керектігі туралы жаднама-буклеттер таратты.

Тыңдайтын құлақ болса...

Басқа да жаңалықтар

Қазақстан теміржолшысы газеті, №46 16 маусым 2026 жыл