Алғыс арқалағандар

Жаңалықтар

06.03.2018, 14:39

Алғыс айту күні қарсаңында «ардагерім – ардағым» акциясы аясында қызылордалық жас теміржолшылардан құрылған еріктілер тобы теміржолшы зейнеткер, жалғызбасты қария Шырынкүл Сатыбалдиеваның үйіне барып, отбасы тіршілігіне көмек жасады. Өмір жолының 33 жылын теміржол саласына арнаған Шырынкүл әжей бір жасы кем сексенде. Отыз жыл бұрын өмірден озған шалы Мұқан Сатыбалдиевтің орнын жоқтатпай, бала шағасын жеткізем деп қара жұмыс істеген кейуана қазіргі таңда өткен күнге шүкіршілік етіп, алдағыға үмітпен қарайды. Себебі мүгедектікке шалдыққан баласының аяғына тұрып, тіршілік жасап кеткенін көру – арманы. Жағдайын сұрай келген теміржолшы жастарды көріп Шырынкүл әже қуанып қалды. Мүгедектікте отырған баласы алаңдататынын айтып, көңілі босағаны болмаса, ардагер әжейдің жағдайы жақсы. «Нұр Отан» партиясы атынан келген теміржолшы жастарға, ардагерлерді назарда тыс қалдырмай отырған Елбасының саясатына ризашылығын білдіріп, баласына да үкімет тарапынан қажет көмектерін алып жатқанын айтты. Ерікті теміржолшы жастар аула тазалап, қарияның қора-қопсысын ретке келтіріп, ауыр жұмыстың бәрін бірнеше сағатта тап-тұйнақтай етіп, қарт ананың алғысын алды.

Алғыс арқалағандар

Басқа да жаңалықтар

Қазақстан теміржолшысы газеті, №13 20 ақпан 2026 жыл