Ана мен бала бақыты

Жаңалықтар

16.03.2018, 17:59

Қызылорда ЖТ бөлімшесінің мәжіліс залында «Теміржол» филиалының ұйымдастырумен «Бала бақыты – Ана бақыты» деген тақырыпта көпбалалы теміржолшы аналармен кездесу өтті. Көпбалалы аналарды қолдау арқылы қоғамдық пікірді қалыптастыру, туындаған проблемалық мәселелерін тыңдау, оны шешуде мемлекеттік органдар мен азаматтық қоғамды жұмылдыру мақсатында өткен шараға көпбалалы отбасында тәрбиеленген 6-10 жас аралығындағы балалар да қатысты. Кездесу барысында көпбалалы аналардың проблемалары да сөз болып, оның шешілуіне ықпал жасалу жұмыстары назарға алынды. Теміржолшы аналар балалары өз қолдарымен дайындаған туындыларын тамашалап, өнерімен өрге жүзген төрт балаға «Ертегі әлеміне саяхат» кітабы сыйға тартылса, шойынжол саласында ерлермен қатар жұмыс жасайтын бірқатар көпбалалы аналарға Алғыс хаттар табысталып, қаржылай көмек жасалды. Сондай-ақ, «Теміржол» партия филиалының ұйымдастыруымен өткен тағы бір шара айрықша қажеттіліктері бар балаларды тәрбиелеп отырған теміржолшы-аналардың бастарын қосып, оларға да демеу болды. Мерекелік шараға «Нұр Отан» партиясы «Теміржол» филиалы төрағасының бірінші орынбасары Базара Танбаева мен филиалдың Саяси кеңес мүшесі, «Қазкөліккәсіп» ҚБ филиал төрағасы Өмірбек Жүсіпов және тағдырларын болат жолмен байланыстырған аналар қатысты. Олар отбасында айрықша қажеттіліктері бар балаларының жағдайларын айтып, мүмкіндігінше олардың қоғамнан тыс қалмауына көмек қолын созып, отбасына түскен салмақты бөлісуге атсалысып, қолдау жасап отырған жандарға алғыс айтты. Шара барысында аналарға құрмет көрсетіліп, балаларының денсаулықтарына қатысты көмек, жеңілдіктер сөз болды. Таудай тауқыметті арқалап, түн ұйқыларын төрт бөліп, үйге де, түзге де үлгеріп отырған аналарға алғыс айтылып, мерекелік шәй сервизі мен гүл шоқтары табысталды.

Ана мен бала бақыты

Басқа да жаңалықтар