Сәуір болмай, тәуір болмас

Жаңалықтар

20.03.2018, 17:04

Биыл Жамбыл өңірінде күннің көзі ерте жылып, қыс айларында мол түскен қар мен ылғалдың салдарынан қызыл су біраз елдімекен тұрғындарын әбігерге салды. Әсіресе, таулы аймаққа жақын маңдағы ауылдардың жағдайы мүшкіл еді. Төтеншеліктер ерте дабыл қаққанымен ағын судың бетін қайтару оңайға түспеді. Дегенмен, бұл жайды жыл сайын зерделеп, қауіпті аймақтардың картасын белгілеп алған әулиеаталық теміржолшылар пойыздар қозғалысын тоқтатқан жоқ. Рас, Маймақ станциясы және Луговой бағытындағы 96,97-шақырымда аздаған кедергілер болғанымен, анау айтқандай олқылықтар орын алған жоқ. Жамбыл магистральдық желі бөлімшесінің директоры Қайрат Сазаев төрағасы, ЖТ Жамбыл бөлімшесінің бас инженері Алексей Ким орынбасары болып жасақталған арнайы штаб алдын алу шараларына ерте кіріскен. – Су тасқынының алдын алу бойынша төрт пойыз толық жасақталып, Сары Шаған, Шу, Жамбыл және Түлкібас станцияларында тұр. Барлығы 36 вагонға керек-жарақтың барлығы тиеліп, мамандар жауапкершілігі де ескеріліп отыр. Жуырда Маймақ станциясында ағын судың қаупі жоғары деген хабар келді. Дегенмен, ол қауіпті аймақ ретінде біздің назарымызда тұрған жай. Бірақ биыл таудан аққан судың арық көздері бітеліп, көміліп, біраз кедергілер келтірді. Алайда, қозғалыс қаупсіздігіне еш кедергі келтірілген жоқ. Онда арнайы кезекшілік ұйымдастырылып, алдын алу шаралары нұсқаулыққа сай жүргізілді, – дейді Жамбыл магистральдық желі бөлімшесі директорының орынбасары Махмудин Абдулаев. Оның үстіне биыл күн ерте жылып, жердің тоңы жібімегендіктен ағын су жерге сіңбей аққан. Ал Луговой бағытындағы жағдай бойынша, онда да таудың суы егіндіктен ағып келіп теміржолдың маңына жиналған. Теміржолшылар дереу судың көзін ашып, ағызып жіберген. Осыдан бірнеше жыл бұрын Түркіменстаннан Қытайға газ құбыры тартылып, құрылыс жұмыстары жүргізілген. Сонда газ құбырлары жердің астына көміліп, кей жерлері тапталмай кеткен көрінеді. Міне, су осындай тапталмаған жерлерді шайып, жиналыпты. Сонымен қатар Ақыртөбе станциясының маңындағы ауылдарды су шаюының да себебі бар екен. Бұрын Кеңес үкіметі тұсында ауыл маңында дамбалар болатын. Осы қолдан жасалған шағын су қоймаларында ерте көктемде ағын су жиналып, жердің тоңы жібігенде сіңіп кететін дейді. Қазір осы дамбалардың дені бұзылған. Олардың орнына шаруа қожалықтардың үй-жайы, қоралары соғылған. Тіпті ауыл ішіндегі арықтар тегістеліп, құрылыс салынып кеткен. Сонда ағын су қайда барады? Осыны ескерген жөн дейді мамандар. – Біз алдын ала қауіпті аймақ деп танылған телімдер бойын түнде жарықтандыру жұмыстарын жүргізіп, локомотив бригадаларын ескертіп, кезекшілік ұйымдастырдық. Мұндай алдын алу шаралары көктем айының соңына дейін жүреді, себебі «сәуір болмай, тәуір болмас» деген сөз тегін айтылған ба, көктемнің күнінен әр нәрсе күтуге болады, – дейді магистральдық желі бөлімшесі директорының орынбасары.

Сәуір болмай, тәуір болмас

Басқа да жаңалықтар

Қазақстан теміржолшысы газеті, №39 22 мамыр 2026 жыл