Қауіпті жүктерге – қатаң тексеру

Жаңалықтар

28.03.2018, 16:24

Соңғы кезде ел теміржолы бойынша цистерна бөлшектерінің тесілуінен болмаса дұрыс жабылмауынан бензиннің ағып кетуі екі рет орын алды. Күн жылынып, жер қарайғалы мұндайда оттың тұтануы оңай. Сондықтан, наурыздың 12-сінен бастап Шымкент ЖТ филиалында «Цистернадағы қауіпті жүктерді бақылауды күшейту» айлығы жүруде. – Бізде «Нұрайыл», «Оңтүстік мұнай сауда», «Б.Е.Б. Ойл» сынды мұнай-газ өнімін жанармай құю бекеттеріне тасымалдайтын мекемелер негізінен солярка мен бензин түсіреді. Сондықтан, кейде бос жолдарда жөнелуін күтіп тұрған сұйық отын тиелген цистерналарды, оларды құйып алатын кірме жолдарды қадағалаймыз. Бұл бағытта Шымкент мұнай өңдеу зауытының маңындағы Текесу мен Қазығұрт бекеттерінде, вагондарды жуып, шаятын ППС мекемесінде тексеру жұмысы қатаңдатылуда. Майды цистернаға құйған соң, қақпағына дейін қарап шығады. Егер жазатайым ағып кетсе, оның зардабы қиын, жанып кетуі, жарылыс болуы мүмкін. Пойыздар тоқтатылып, вагондар ағытылады, – дейді Бадам бекетінің бастығы Серік Елмұратов. Айлық аясында Павлодар, Атырау, Шымкенттегі мұнай өңдеу зауыттарына, вагондарды жуып, булайтын ППС станциясына жіті назар аударылып, қадағаланбақ. Өйткені, вагондарды жуып-шайып жатқанда суы ағып, жарамайтын жері анық байқалады. Зауытқа берген кезде тағы тексеріледі. Тіпті, бір бұрауы кем болса да, сұйықтық тамшылауы мүмкін.

Қауіпті жүктерге – қатаң тексеру

Басқа да жаңалықтар

Қазақстан теміржолшысы газеті, №108 26 желтоқсан 2025 жыл