Есепке жүйріктің есесі түгел

Жаңалықтар

06.04.2018, 15:43

Семей темір жолында бұқаралық спорттың бірқатар түрлерінен көктемгі біріншілік болып өтті. Сайыс тақталы ойын түрлері бойынша «интеллектуалдар ойыны» болып саналатын шахматтан басталды. Бұл байқауға іріктелген он үміткер қатысып өзара шеберлік сынасқан болатын. Ойшылдар ойынында бақ сынасқан кіл мықты бір-біріне есе бермей ұзақ арбасты. Олардың ойынын бақылаған жанкүйерлердің шыдамдарын тауысып, сағаттарға созылған сайыс нәтижесінде бас жүлдені магистральдық желі бөлімшесі техникалық бөлімінің инженері Ғалымбек Тортаев жеңіп алды. Ал екінші орынды бұрынннан мықты шахматшы ретінде танымал бөлімше басшысының орынбасары Ерғазы Жұмаділов иеленсе, үшінші орынды бөлімше директорының бірінші орынбасары Ғабит Есқожанов қанағат тұтты. Ал командалық ойын бойынша жүк тасымалы бөлімшесінің шахматшыларына қарсылас шақ келген жоқ. Жеңімпаздар ақтық финалда 4:1 есебімен басым түсіп, есепке жүйріктің есесі түгел болатынын дәлелдеді. Сол тәрізді ерлер арасында ұйымдастырылған үстел теннисі ойыны да көктемгі біріншіліктің шымылдығын ашты. Бұл сайысқа бөлімше бойынша 21 үміткер қатысып бақ сынасты. Теміржолшылардың психологиялық жеңілдену бөлмесінде өткен бұл сайыс та мейлінше тартысты әрі қызықты өрбіді. Қатысушылар жас айырмашылықтары бойынша үш топқа бөлініп сынға түсті. Спорттың жалпы бұқаралық түрі болмаса да теміржорлшылар арасында тенниске қызығатындар көп екені таң қалдырмай қоймады және онымен тұрақты түрде айналысатындар да бар болып шықты. Сайыста, әрине, солардың бағы жанды. Қорытынды есеп бойынша сайыс жүлдегері атанғандар қатарында ПЧ-40 мекемесінен Ілияс Несіпқамит, ШЧ-29-дан Рүстем Мұхаметжанов, ЖТ бөлімшесінен Ертарғын Ермековтер әдемі ойын үлгісін көрсетіп, таңдай қақтырды. Сонымен қатар, ойын барысында ерекше белсенділік танытып көзге түскен, жүлделі екенші орын алған спортшылар ТЧЭ-24 мекемесінен Жомарт Құрманбаев пен ПЧ-40-тан келген Ысқақ Көзбаевты атауға болады. Спорттың ек түрі бойынша да жеңімпаздар жүлдесіз қалмады, кәсіподақтың демеушілігімен бәрі де арнайы сыйлықтармен, мадақтамалармен марапатталды. Көктемгі біріншілік мұнымен толастамақ емес. Алдағы уақытта кілең қыздардан тұратын командалар арасында әйелдер футболы ұйымдастырылмақ.

Есепке жүйріктің есесі түгел

Басқа да жаңалықтар

Қазақстан теміржолшысы газеті, №69 01 қыркүйек 2026 жыл