Бірі – бәрі үшін, бәрі – бірі үшін...

Жаңалықтар

27.04.2018, 16:10

Бірнеше ұлтты біріктіретін жолшылар бригадасымен таныса келе, бұл «бір жағадан бас, бір жеңнен қол шығара отырып еңбек ететін өте ұйымшыл ұжым екеніне көз жеткіздік. Астана ірілендірілген жол дистанциясының 2-жол колоннасына қарасты аталмыш бригаданы басқаратын Серік Жүсіпбеков сайдың тасындай іріктелген жігіттерімен мақтанатынын жеткізді. – Теміржол деген аса қауіпті аймақтағы қауіпсіздікті қамтамасыз ету – біздің басты міндетіміз. Астана торабымен қосқанда, Астана-Жайнақ, Астана-Қырқыншы станциялары мен Астана-№39 бекет аралығындағы жолдың күтіміне жауапты болып колоннадағы 6 бригада бөлінген. Қазіргі таңда біз Астана-Жайнақ телімі бойынша 805 км жолдың ескі ағаш шпалдарын жаңалап жатырмыз. Ұжымда ауызбіршілік – бәрінен жоғары. «Біріміз – бәріміз үшін, бәріміз – біріміз үшін» деген ұранмен жұмыс істейміз. Жігіттердің қай-қайсысы болмасын өз кәсібін білетін азаматтар. Сонда да бір-біріне көмектесу, қарайласу – біздің жігіттер арасында жазылмаған заңдылық. Бұл тек жұмысқа қатысты емес, әлеуметтік мәселеге де байланысты. Ұлттық мереке, ресми мейрамдарды бірнеше ұлт өкілдерінен құралған ұжым бірге атап өтіп, бір-бірінің дәстүрі мен ұстанымына құрметпен қарайды, – дейді колонна бастығы Серік Жүсіпбеков. Айтса айтқандай, бірнеше ұлттан құралған бригадада 35 жылдық еңбек өтілі бар Владимир Вильковский поляк болса, Кудбидин Мутихов – 15 жылдық тәжірибесі бар тәжік ұлтының өкілі, Валерий Щукиннің ұлты неміс, ал Николай Горбунов және Сергей Григориев сынды азаматтар орыс ұлтының өкілдері екен. Бұлардың қатарында, әрине, 15-20 жылдық тәжірибесімен танылған, өз істерінің білгірлері Марат Әубәкіров, Жолдасбай Тәжмиев сынды қазақ азаматтары да бар. Жолшылар бригадасы алдағы жаз маусымына сақадай сай дайын. Жаз пен күзде олар бағыттама бұрмаларын ауыстыру кезінде сол бұрмалар астындағы ағаш шпалдарды темір-бетонға ауыстыру жұмыстарын жүргізеді. Колонна биылғы көктемгі комиссиялық байқаудан да жақсы көрсеткіштермен өтіпті. Жолшылар ұжымының ең үлкенінің жұмыс тәжірибесі 30 жылдан асқан болса, 2-3 жылдық еңбек өтілі бар жастардың аға буыннан үйренері көп. Сондықтан оларды көптен келе жатқан кәнігі жолшылардың «тәрбиесіне» беретін де дәстүр бар екен бұл ұжымда. Жыл он екі айдың кез келген маусымында жол бойында, ашық аспан астында еңбек ететін олар, ең бастысы, отбасын адал еңбекпен асырап отырғандарын мақтан тұтады. Сол арқылы отандық теміржолдың дамуына үлестерін қосуда.

Бірі – бәрі үшін, бәрі – бірі үшін...

Басқа да жаңалықтар

Қазақстан теміржолшысы газеті, №51 04 шілде 2025 жыл