Сервис талапқа сай болу үшін...

Жаңалықтар

12.08.2016, 16:43

Жолаушы вагондарының қауіпсіздігі мен жайлылығына көп нәрсе байланысты. Ақаусыз, есік-терезесі айнадай жарқырған таза, ішкі интерьері мұнтаздай, жып-жинақы, ұядай ыңғайлы вагонмен сапар шеккен жолаушы өзін үйдегідей жайлы сезінері анық. Жуырда біз «Вагон-сервис» АҚ-ның Батыс филиалына қарасты Атырау телімінде болып, қала сыртында жаңа орынға қоныс тепкен мекеменің қызметімен танысып қайтқан едік: жолаушы вагондарына көрсетілер сервистік қызмет деңгейі қандай? Атырау телімінің бастығы Ерлан Дүйсембаевты жұмысшылармен таңертеңгілік лездеме үстінде «ұстадық». Кешкі келген жолаушылар пойызында орын алған кем-кетік, әйнегі шағылған, қол жуғышы істен шыққан деген сынды жеңіл-желпі ақаулар жіпке тізілгендей алдында жатыр, соларды қалпына келтіру, сонымен қатар күні бойғы істелетін жұмыстар, сапарға дайындалатын құрамдар әзірлігі тағысын тағы жұмыстар осы жерде талқыланып, әркім өзіне тиесілі міндетін бөліп алып жатыр... Мұнда вагондарды жууға және қауіпсіздігін тексеруге, тиісінше жөндеу жұмыстарын жүргізу үшін барлығы 7 жолдар қарастырылыпты. Оның алтауында жолаушылар пойызы қабылданып, жуылады екен. Ал, соңғы жол жөндеуге тұрған вагондарға арналған. Ерлан Дүйсембаевтан білгеніміздей, бұл жерде «ТО-1» тобының жұмысшылары вагондарға техникалық қызмет көрсетсе, «ТО-3» тобының жұмысшылары 6 ай сайын вагондарды жөндеуден өткізеді. Ал, «ТОР» тобының жұмысшылары болса, сапардан келген барлық вагондардың жұмысын тыңғылықты зерттеп, қажет болса дөңгелек ауыстыру, электр тоқтарын жөндеу, дөңгелектерді майлау, т.б. жұмыстарды атқарады. Одан әріректе көмір қоймасы орналасыпты. Ол жерде қыс мезгілінде вагондарды жылыту үшін жеткізілетін көмірдің түсіру орны арнайы техникаларымен бірге дайын тұр. Өткен 6 айда жоспарды 98 пайызға орындадық. Вагон жуу кезінде бұрынғы орнымыз тарлық етіп келген болатын. Тіпті, пойыз құрамы сыймай кететін еді. Тар орында жұмысшыларымызға вагондарды ажырату да қиынға соғатын. Ал, пойыздарды жуу кезінде сондай тар жерде вагондарды бірінші жолдан екіншісіне ауыстыру кезіндегі қиындықтардың өзі бөлек әңгіме болатын. Бүгінде кең де ыңғайлы жаңа орында жұмысшы-қызметкерлеріміздің жаны кіріп қалды, – дейді филиал бастығының міндетін атқарушы. ҚТЖ салып берген жаңа ғимарат заманауи жабдықтармен толық қамтылған, өте ыңғайлы, жұмысшылар үшін киініп-шешінетін, жуынатын душ, кептіретін орын секілді барлық жағдай қарастырылған. Жұмысшылар техникалық және еңбек қауіпсіздігі сабақтарын да заманауи ақпараттық құрылғылармен жабдықталған кабинетте өткізеді. Қызметкерлер жоспарлы түрде аттестациядан өтіп тұрады екен. Сондай-ақ, жұмысшы-қызметкерлердің жұмысқа қатынау мәселесі де жолға қойылған көрінеді. Филиал басшысының айтуынша, мекеменің арнайы бөлінген автобусы жұмысшыларды белгіленген маршрут бойынша жұмысқа әкеліп, әкетіп отырады.

Сервис талапқа сай болу үшін...

Басқа да жаңалықтар

Қазақстан теміржолшысы газеті, №34-35 01 мамыр 2026 жыл