Құрық – Жібек жолының тоғысқан нүктесі

Жаңалықтар

12.08.2016, 17:01

Маңғыстау облысына іс сапары кезінде ҚР Премьер-министрі Кәрім Мәсімов Каспий жағалауындағы Құрық портында салынып жатқан паром кешенінің құрылыс барысымен танысты. Елбасының тапсырмасымен келген Үкімет басшысына «Қазақстан темір жолы» ҰК» президенті Асқар Мамин паром кешенінің салыну барысы туралы баяндады. Кешенге Боржақты – Ерсай теміржол желісі мен паром өткелі кіреді. Жоба Маңғыстау облысында «Нұрлы жол» инфрақұрылымды дамытудың мемлекеттік бағдарламасы аясында жүзеге асырылуда және ол Каспий теңізінің порттары арқылы Қазақстанның транзиттік әлеуетін арттыру үшін стратегиялық тұрғыдан маңызды болып табылады. Кешеннің жоспарланған қуаты жылына 4 млн тоннаға дейін жүкті: мұнай өнімдерін, химикаттарды, тыңайтқыштарды, астықты өңдеуді қарастырады. Құрық портында паром кешенін салу 2015 жылдың сәуір айында басталған. 2015 жылдың маусым айында Боржақты – Ерсай теміржол желісі бойынша құрылыс жүктерін жеткізу үшін жұмыс қозғалысы ашылды. 2016 жылдың соңында алғаш іске қосылатын кешенді пайдалануға беру жоспарланып отыр. Ал екінші іске қосылатын кешен нысандарының құрылысы 2017 жылға жоспарланған. Паром өткелінің құрылысы мен оны Құрық портына жақын жағалау инфрақұрылымы нысандарына апаратын Боржақты – Ерсай темір жол желісімен қосу мультимодальдық жүк тасымалын қамтамасыз етеді, бұл өз кезегінде транзиттік жүк ағынын арттырып, республиканың экспорттық әлеуетін ұлғайтады. «Өткен жылдан бастап Қазақстан ДСҰ мүшесі атанды, бұл бізге әлемдік кеңістіктегі 160 мемлекеттің нарығын ашады, әсіресе, Қытай, Иран, Ресей, ЕО-қа жол ашылады. Бізге осы нарықтарды қалай жаулап алу туралы ойлану керек. ҚР Үкіметі қазақстандық тауарларды сыртқы нарыққа шығаруды қолдау бойынша шаралар кешенін әзірлеуі тиіс. Бұл әрбір облыс, қала, аудан әкімінің басты міндетіне айналуы керек», – деді ҚР Президенті Н. Назарбаев 2016 жылдың бірінші жартыжылдығындағы индустрияландыру қорытындылары бойынша шілде айында өткен кеңесте. Жекелеген өнім түрлерінің – уран өнімдері, сары фосфор, ұн, титан, мыс, мырыш экспорты бойынша еліміз әлемде көшбасшы орынға ие. Қазақстан әлемнің 200-ден астам елімен сауда-саттық қарым-қатынасын орнатқан. Сыртқы сауда Орталық Азия, ЕАЭО, Кавказ елдерімен аса қарқынды жүрді. Инвестициялар мен даму министрлігінің болжамына сүйенсек, 2020 жылға қарай Қазақстанның экспорт көлемі 13,8 миллиард доллардан 16,5 млрд долларға дейін артады. Еске сала кетейік, Құрық портындағы жаңа паром кешені тәулігіне бес паромға қызмет көрсетеді. Сол арқылы жылына 4 миллион тонна жүкті өңдейтін болады. Аталған порттағы ауқымды жұмыстар мен Боржақты – Ерсай темір жол желісі басты жүктер мен сұйық жүктерді мультимодальдық тасымалдауға арналады. Бұл өз кезегінде Каспий өңіріндегі батыс бағдардың экспорттық әлеуетін арттырады. Құрық паром кешені «Нұрлы жол» бағдарламасы аясындағы нысан ретінде Қазақстанның транзиттік көліктік әлеуетін көтереді. Ұлы Жібек жолының дамуына ықпал ететін бірегей жоба биыл жылдың соңында аяқталып, алғашқы жүк кемесін қабылдай бастайды деп жоспарлануда. Бұл – бірінші іске қосу кешені, ал екінші іске қосу кезеңі келесі жылға жоспарланып отыр. Ұлы Жібек жолының тоғысқан нүктесіне айналады деп күтіліп отырған жобаның болашағы ғаламат зор.

Құрық – Жібек жолының тоғысқан нүктесі

Басқа да жаңалықтар

Қазақстан теміржолшысы газеті, №101 05 желтоқсан 2025 жыл