Әріптестері автокөлік сыйлады…

Адам баласының түрлі келеңсіз жағдайға тап болуы, әсіресе қауіпті аймақ саналатын теміржолда таңсық емес. Алайда олардың бірі өндірісте бақытсыз жағдайға тап болса, енді бірі жеке басының қауіпсіздік шараларын сақтамауы салдарынан ұшырайды. Егер жұмысшы өндірістік жарақат алса, зардап шегушіге Ұлттық компания қолданыстағы заң шеңбері аясында барлық жағдай жасайды. Пойыз құрастырушы болып жұмыс жасап жүріп 2011 жылы жазатайым оқиғаға ұшырап, екі аяғынан айрылған Мұса Бегалиев – солардың бірі. Жуырда Ұлттық компания теміржолшылары атынан Қызылорда ЖТ бөлімшесінің директоры Аманкелді Арысбаев Мұса Шәкиұлына «Лада-Гранта» автокөлігінің кілтін табыс етіп, алдағы күндерінің жақсы жаңалыққа толы болуына тілектестік білдірді. – Теміржолшыларды әлеуметтік тұрғыдан қолдап, оларға көмек беру – Ұлттық компанияның бірден бір ұстанымы. Бүгін біздер соның бірінің куәгері болып көріп отырмыз. Мұса Бегалиевтің әлеуметтік жағдайына көмек теміржол басшылығы мен кәсіподағы және партия тарапынан да жасалып келеді. Бүгінгі игі іс ҚР Еңбек кодексінің талаптары мен «ҚТЖ» ҰК» компаниясының ұжымдық шартына сәйкес орындалып, кешегі әріптесімізге қолдан келгенше көмек қолын созып отырмыз, бұл – біздің парызымыз, – деді аймақ теміржолшылары атынан автокөлік кілтін табыстаған Аманкелді Арысбаев. Қызылорда магистральдық желі бөлімшесі директорының орынбасары Ғалымжан Жұмағалиев Мұса Бегалиевтің барлық құжаттарын заң аясында реттестірсе, «Кедергісіз келешек» партиялық жобасы аясында мүмкіндігі шектеулі жандардың қоғамнан тыс қалмауын қадағалап, қажет кезде кеңес пен көмек беріп, осындай ізгі іс-шараның ортасынан табылатын «Нұр-Отан» партиясының «Теміржол» филиалының өкілі Базара Танбаевалар кешегі әріптестерін қуанышымен құттықтап, жылы лебізін білдірді. – Алты балалы Мұса Бегалиевтің басындағы қайғылы жағдай 2011 жылы орын алған, содан бері оған Ұлттық компания тарапынан ҚР Еңбек кодексінің талаптарына және «ҚТЖ» ҰК» компаниясының ұжымдық шартына сәйкес қажетті көмек беріліп келеді. Оның өзінің жеке арызына қатысты оған автокөлік берілуіне көмек бердік және осы автокөлігі үшін ай сайын 50 литр жанармай берілетін болады, – деді Қызылорда магистральдық желі бөлімшесі директорының орынбасары Ғалымжан Исағалиұлы. Отбасы, бала-шағасымен қызыл-жасыл безендірілген автокөлікке отырған Мұса Шәкиұлы әріптестеріне ризашылығын жасырмады. – Менің басымдағы ауыр жағдайды бөліскен әріптестеріме алғысым шексіз. Теміржолшылар мені әрдайым қолдап келеді. Менің балам Қуаныштың Қызылорда станциясына жұмысқа орналасуына жағдай жасады, бүгін, міне, мені протез аяқпен жаяу жүрмесін деп көлік сыйлап отыр, барлық теміржолшыға амандық, денсаулық тілеймін, теміржолдың табысы ортаймасын, – деді  ол.   Сабырхан СЕЙІЛБЕКҰЛЫ, Қызылорда Суретті түсірген Өмірбай Түменбай