Төрт балға бағаланды
![](https://rail-news.kz/uploads/posts/2018/11/13/1542084247850.jpeg)
Маңғыстау локомотив пайдалану депосы бойынша локомотивтердің техникалық жағдайын қыстық режимге өткізу жұмыстары 10 қырқүйектен бастап 31 қазанға дейін жалғасқан күзгі комиссиялық байқау (ККБ) кезінде жасалды. Нәтижесінде ККБ шыққан локомотивтерге биылғы қойылған орташа баға 4 балды құрады. Өткен жылы да сол баға болған еді.
Еске сала кетсек, күзгі байқауға «ҚТЖ-Жүк тасымалы» АҚ-ның Маңғыстау бөлімшесі директоры Нәжімеден Ғұбашовтың 18.09.2018 жылғы №65 бұйрығымен комиссия мүшелері тағайындалып, жасалынатын жұмыстар бойынша жиналыс өткізілген болатын. Соған сәйкес, ККБ-ға барлығы 44 локомотивті қою жоспарланған еді. Оның ішінде 32 локомотив 2ТЭ10МК сериялы, 12 локомотив ТЭМ сериялы. Локомотив бригадаларының күшімен 44 локомотивтің де машинист кабиналарының жылыту жұмыстары жүргізілілген. Жылытқыш қондырғыларының жұмысқа жарамдылығы тексерілген. СуперСкид сериялы локомотивтердің жылы ауаны дизель бөлігінен алу үшін сырттан ауа сорғыш бөліктері жабылған. 12 дана ДуалСкид сериялы локомотивтердің қызыл және сары түстері қайтадан сырланып, жаңартылған. Осылайша, локомотивтер аязды маусымға сақадай сай етіп қойылған. Бұл жөнінде депоның жетекші инженер технологы Саясат Қылышбаев ақпарат берді.
− Маңғыстау станциясында МК сериялы тепловоздарға сервистік қызмет көрсететін орталықтың болмауына байланысты Маңғыстау паркіне тиесілі тепловоздар Мақат, Шалқар сервис орталықтары мен Қазалы локомотив жөндеу зауытында, Сексеуіл сервис мекемелерінен жоспарлы жөндеу және ККБ-дан өткізілді. Ал маневрлы ТЭМ сериялы тепловоздар болса, «Ғасыр-Маңғыстау» жауапкершілігі шектеулі серіктестігінен жоспарлы жөндеу мен күзгі бақылаудан өтті. Жалпы бүгінде Маңғыстау депосында барлығы 57 тепловоз бар. Соның ішінде күрделі сервистік қызмет көрсету 4,5,6,7 жөндеулеріне және техникалық қызмет көрсету 7,8 жөндеулеріне ағытылуына орай 13-і тізімнен алынып қалды. Олар байқаудан автоматты түрде өтеді, – дейді Саясат Қылышбаев.
Оның сөзінше, биыл локомотив пайдалану депосында материалдық-техникалық жағдай бұрынғымен салыстырғанда 20-30 пайызға жақсарған. Маңғыстау депосы, Бейнеу айналым депосы бойынша екінші техникалық қызмет көрсету пунктіндегі жұмысшылардың құрал-саймандары жаңартылған. Депо аймағын көгалдандыруға да баса назар аударылып, 30 түп ағаш отырғызылған. Маңғыстау, Бейнеу, Сайөтес, Жаңаөзен бойынша локомотив бригадаларының демалыс үйлеріне 5 кір жуғыш машинасы, 8 ауа салқындатқыш, 3 мұздатқыш алынған.
Шахида ЖҰМАН, Маңғыстау