Тексеру жүргізілді
![](https://rail-news.kz/uploads/posts/2018/11/15/1542272426770.jpg)
Ел аумағында теміржол вокзалдары мен жолаушылар пойыздарында тексерулер жүргізіліп, бірқатар заң бұзушылық деректер тіркелді.
– ҚР ІІМ Көліктегі полиция департаментінің Кинологиялық қызмет орталығының қызметкерлері қызметтік-іздестіру иттерінің көмегімен есірткі, жарылғыш заттарды, қару-жарақ пен оқ-дәрілерді анықтап, табу үшін еліміздің темір жол вокзалдары мен әуежайларда және жолаушылар пойыздарында күнделікті пысықтау жұмыстарын жүргізді, – деп хабарлайды Кинологиялық қызмет орталығының бастығы Бағлан Жарылқасынұлы.
Оның айтуынша, қызметтік-іздестіру иттерінің көмегімен есірткі заттардың заңсыз айналымының 211 фактісі анықталған, оның ішінде жолаушылар пойыздарында 155 дерек, теміржол вокзалдарында 49 дерек, әуежайларда 7 жайт тіркеліпті. Заңсыз айналымнан 100 кг-нан астам түрлі есірткі заттары тәркіленген.
Кинологтар аймақтардағы «Допинг», «Правопорядок», «Транзит», «Көкнар» секілді жедел-профилактикалық және іздестіру іс-шараларына белсенді түрде қатысады. Мәселен, «Алматы-Маңғышлақ» бағытындағы жолаушылар пойызында «Рекс» лақап атты қызметтік иттің көмегімен Жамбыл облысының тұрғынынан 16 кг кептірілген «марихуана» есірткі заты табылып, тәркіленген.
Еске сала кетсек, биылдыққа есірткі заттардың заңсыз айналымына қатысты 410 құқық бұзушылық анықталып, олардың 36 фактісі өткізу және сақтауға қатысты, 16 фактісі есірткі заттарды контрабандалық жолмен алып өтуге қатысты болған.
Бекбол Құлдан, Астана