Маңғыстаудың жас теміржолшылары "Жайдарман" ойындарында екінші орынды иеленді
![](https://rail-news.kz/uploads/posts/2018/11/22/1542885357061.jpg)
Маңғыстау облыстық жастар саясаты мәселелері басқармасының ұйымдастыруымен өткен «Жайдарман» сайысының облыстық ашық чемпионатының жоғарғы лигасына қатысқан «Маңғыстау.кз» тобы екінші орынды еншіледі.
Бұл – түбектегі теміржолшылар командасының аймақтық жарыстың финалына алғаш шығуы. Сондықтан, бірінші орын бұйырмаса да теміржолшы жігіттердің салы суға кеткен жоқ. Бас бәйге қолдан шығып кеткенмен есесіне республикалық сайыстың жолдамасы теміржолшылар тобының қанжығасына түсті.
− Біз бастапқы екі көріністе де ұпай жағынан бәрінен алда келе жатқан едік. «Бір әуен аясында» шартында аздау балл жинап қалдық. Сол тағдыр шешуші «шайқас» болды. Дегенмен, ойынның аты − ойын. Бірінші жыл болғандықтан екінші орынның өзі жетістік. Енді желтоқсан айындағы «ҚТЖ» форумына дайындаламыз. Бұйырса, әлі талай белестерді бағындырамыз, – дейді аймақтағы теміржол жастарының өкілі, «Маңғыстау.кз» командасы жетекшісі Қуатбек Көпбаев.
Финалда жалпы төрт команда төрт шарт бойынша сынға түсті. Қатысушылар «Сәлемдесу», «Фото ширату», «Бір әуен аясында», «Үй тапсырмасы» тапсырмаларын орындап, қосымша қызықты сұрақтарға жауап берді. Бірінші орынды аймақтағы жоғарғы лигада қатарынан үшінші жыл ойнап жүрген бейнеулік «Сіздер үшін» тобы иемденді. Десе де, қазылар алқасының шешімі Астанада өтетін республикалық «Жеңімпаздардың жеңімпазы» байқауына теміржолшылар командасы да қатыспақ. Ендеше, жігіттерге сәттілік!
Шахида Жұман, Маңғыстау