Тараз теміржолшылары құбылмалы күн райында қалай жұмыс істеу керектігін үйренеді
Тараз станциясында техникалық, өндірістік оқу-жаттығу жұмыстары толассыз жүреді. Өйткені, стратегиялық нысан саналатын станцияда қаперде жүрер, босаңсуға жол беруге болмайтын басты талаптар көп екені даусыз.
Сондықтан, станция қызметкерлері қанша жерден білікті маман болса да, техникалық дәрістерден тыс қалмауға міндетті. Жуырда станцияда айына екі мәрте өтіп тұратын техникалық оқыту шаралары ұйымдастырылып, онда теміржолшылар жеті тақырып бойынша білікті мамандарды тыңдап, артынша тест түріндегі сынақ тапсырды.
Станцияның бас инженері Солтон-Мұрат Тоқтанаев, еңбек қауіпсіздігі жөніндегі инженері Ербол Оспанов және ШЧ-36 аға механигі Сергей Беспалько сынды өз ісінің білікті мамандары негізінен еңбек қауіпсіздігі мен жол қауіпсіздігін сақтау, санитарлық талаптарды жіті қадағалау, станция құрылғылары мен жалпы күтімін бақылау сынды негізгі тақырыптар бойынша дәріс оқыды.
Тыңдаушылардың бәрі тесттен сүрінбей өтіп, ойдағыдай сынақ тапсырды. Станция бастығының міндетін атқарушы Медет Қолдасовтың айтуынша, жақын күндері теория мен практика ұштастырылған кең көлемді оқыту жұмыстары жүргізіледі. Оқыту барысында қиын ауа райы жағдайында, яғни, қарлы-боран, жауынды-шашынды күндері жұмыс істеу режимін қалай ұйымдастыру жолдарын, оқыс жағдайда шұғыл шешім шығару әдістерін тәптіштеп түсіндірмек. Ол үшін мамандардың көмегімен алдын ала бейнетүсірілім жасалып, қазір монтаждалып жатыр екен. Яғни, станция теміржолшыларына сол бейнематериал бойынша дәріс өткізу көзделуде.
Жасұлан СЕЙІЛХАНОВ, Жамбыл