Қазақстан мен Ресей арасындағы жүк тасымалдау көлемі 21 млн тоннаны құрады
![](https://rail-news.kz/uploads/posts/2019/4/29/1556554750034.jpg)
Қазақстан мен Ресей темір жолдары ортақ көлік дәліздерін тиімді пайдаланып, табыс табуға мүдделі. Екі ел арасындағы жүк тасымалы соңғы уақытта айтарлықтай ұлғайып отыр.
2018 жылы Қазақстан мен Ресей арасындағы жүк тасымалдау көлемі 2017 жылмен салыстырғанда 467,7 мың тоннаға артып, 85,4 млн тоннаны құраған. Ал биылғы жылдың І тоқсанының қорытындысы бойынша жүк тасымалдарының көлемі 21 млн тоннаны құрап отыр.
Қазақстан Республикасының Премьер-министрі Асқар Мамин «Ресей темір жолдары» компаниясының бас директоры, басқарма төрағасы О.Белозеровпен кездесу өткізді.
Мәселені талқылауға ҚР индустрия және инфрақұрылымдық даму министрі Р.Скляр, «Қазақстан темір жолы» ұлттық компаниясының басқарма төрағасы С.Мыңбаев қатысты, деп хабарлайды үкіметтің баспасөз қызметі.
Кездесу барысында Қазақстан мен Ресейдің көлік-логистикалық жүйелері арасындағы ынтымақтастықты одан әрі тереңдету және кеңейту, бірлескен транзиттік әлеуетті дамыту және жолаушылар мен жүк тасымалдаудың тиімділігін арттыру мәселелері қаралған. «РТЖ» ААҚ бас директоры О.Белозеров қазақстандық әріптестермен өзара қарым-қатынас ресейлік темір жол жүйесі үшін аса маңызды екенін атап өтті. «Осы жылдың қаңтарнаурыз айларында транзиттік тасымалдар өткен жылдың сәйкес кезеңімен салыстырғанда 51%-ке артты және біз ынтымақтастықты кеңейте түсуге ниеттіміз», – деді О.Белозеров.
ҚР Премьер-министрі А.Мамин Қазақстанның өзара тиімді шарттармен сындарлы ынтымақтастықты кеңейте түсуге ниетті екенін атап өтті. Сонымен бірге, ҚР Үкіметінің басшысы «Бір белдеу, бір жол» жобасының аясында екі елдің темір жол жүйелерінің бірлесіп қатысуының үлкен әлеуетін айтып өтті.
Жалпы алғанда, тараптар қазіргі өзара іс-қимылды нығайтуды жалғастыруға және ынтымақтастықтың жаңа бірлескен бағыттарын іске асыру жөніндегі жұмыстарды жандандыруға ниет білдірді.